Хураангуй:
Энэхүү судалгааны ажил нь олон улсад түгээмэл судлагддаг ухагдахуун болох байгууллагын амьдралын мөчлөгийн онолын таван үе шатны загвар дээр сайжруулалт хийсэн FSS (five stage scale)-аар жижиглэн худалдааны салбарт үйл ажиллагаа эрхлэгч сүлжээ дэлгүүрүүдийн амьдралын мөчлөгийг үнэлэх, уг үзүүлэлтийг турших зорилготой. Байгууллагын амьдралын мөчлөгийн загвар нь аливаа байгууллагыг үр дүнтэй удирдах удирдлагын зарчим болдог.
Менежментийн шинжлэх ухааны судалгааны аргазүй дотроос дискретив арга, позитивизм хандлагыг баримтлан судалгааг хийж гүйцэтгэлээ.
Магадлалт бус зорилтот түүврийн аргаар сонгосон дунд болон дээд түвшиний менежерүүдээс Лестир, Жон Аллан Парнель, Шон Грэхер (2003) нарын эмпирик судалгаагаар туршсан “FIVE STAGE SCALE” болох 5 бүлэг 20 асуултаар анкетийн аргаар өгөгдөл цуглуулж, менежерүүдийн бодол дээр тулгуурлан сүлжээ дэлгүүрийг үнэлэхийг зорилоо.
Судалгааны үр дүнгээр Улаанбаатар хотод үйл ажиллагаа явуулж буй сүлжээ дэлгүүрүүд байгууллагын амьдралын мөчлөгийн таван үе шатны загварын 2 болон 3-р үе шатанд байршиж байна.
FSS-ыг туршиж үзэх судалгааны зорилгын дагуу фактор шинжилгээ болон бусад тоон судалгааг хийхэд түүврийн тоо бага байсан нь үр дүн сул гарахад нөлөөлсөн боловч хүчин зүйлүүдийн дундаж утгаар сүлжээ дэлгүүрүүдийг үнэллээ. Хүчин зүйл бүрийг 3-4 үзүүлэлтээр хэмжих бол багадаа 300 түүвэр сонгох нь (Keith Widaman, 1999) зүйтэй гэсэн зөвлөмжийн дагуу түүврийн тоог хангалттай болгож (300 дээш) дараагийн судалгаанд ашиглах боломжтой гэж үзэж байна.
