Хураангуй:
Энэхүү судалгааны ажил нь Монгол Улсын эдийн засгийн голлох салбар болох уул уурхайн салбар дахь төрийн өмчит болон гадаадын хөрөнгө оруулалттай компанийн санхүүгийн гүйцэтгэлийг харьцуулан шинжлэхэд чиглэгдсэн болно.
Судалгаанд 2023–2024 оны хугацаанд Эрдэнэс Тавантолгой ХК болон Оюу Толгой ХХК-ийн аудитлагдсан санхүүгийн тайлангийн мэдээлэлд тулгуурлан шинжилгээ хийсэн.
Судалгааны хүрээнд санхүүгийн гүйцэтгэлийг үнэлэхдээ хэвтээ болон босоо шинжилгээ, санхүүгийн харьцааны шинжилгээ (ашигт ажиллагаа, хөрвөх чадвар, өр төлбөрийн түвшин), мөн Алтман Z-score загварыг ашигласан бөгөөд ингэснээр компанийн санхүүгийн байдал, тогтвортой байдал, эрсдэлийн түвшинг олон талаас нь үнэлэх боломж бүрдсэн.
Судалгааны үр дүнгээс харахад төрийн өмчит компанийн ашигт ажиллагаа, орлогын өсөлт, санхүүгийн тогтвортой байдал харьцангуй өндөр байгаа нь экспортын хэмжээ, зах зээлийн нөхцөл, төрийн дэмжлэгтэй холбоотой байна. Харин гадаадын хөрөнгө оруулалттай компанийн хувьд технологийн давуу тал, менежментийн үр ашиг, урт хугацааны өсөлтийн боломж илүү тодорхой ажиглагдсан боловч өрийн санхүүжилт өндөр, санхүүгийн эрсдэл харьцангуй мэдрэг байдалтай байна. Түүнчлэн судалгаагаар санхүүгийн гүйцэтгэл нь хүний нөөцийн бодлого, цалин урамшуулал, ажлын байрны тогтвортой байдалтай уялдаа холбоотой болохыг харуулсан.
Энэхүү судалгааны үр дүн нь уул уурхайн салбарын санхүүгийн менежмент, бодлого боловсруулалт, хөрөнгө оруулалтын шийдвэр гаргалтад практик ач холбогдолтой бөгөөд цаашид өмчлөлийн хэлбэрээс хамаарсан ялгааг илүү гүнзгий судлах үндэс суурь болно.
