Хураангуй:
Гэр бүлийн маргаан нь хүүхдийн эрх, талуудын харилцаа, нийгмийн тогтвортой байдалд шууд нөлөөлдөг онцлогтой. Иймээс зөвхөн шүүхийн албадлагат арга бус, талуудын эвийн журмын оролцоонд суурилсан эвлэрүүлэн зуучлал нь богино хугацаанд, хор уршиг багатай шийдэлд хүрэхэд чухал ач холбогдолтой. Монгол Улсад гэр бүлийн маргаанд эвлэрүүлэн зуучлал нь Гэр бүлийн тухай болон Иргэний хэрэг шүүхэд хянан шийдвэрлэх тухай хуулиар зохицуулагдсан ч практикт үр дүн тогтворгүй, маргаан дахин давтагдах тохиолдол их байна. Үүнд эвлэрүүлэн зуучлалын бүтэц, мэргэжлийн оролцоо, талуудын ойлголт болон эрх зүйн зохицуулалтын тодорхойгүй байдал нөлөөлдөг. Энэхүү судалгааны зорилго нь Монгол Улсын гэр бүлийн эвлэрүүлэн зуучлалын үр нөлөөг онол, практикийн хувьд судалж, АНУ, Япон Улсын туршлагатай харьцуулан шинжилж, үр дүнтэй хэрэгжилтэд хүрэх эрх зүйн болон бодлогын санал боловсруулахад оршино.
