Хураангуй:
Энэхүү дипломын ажил нь Монгол Улсын нээлттэй хувьцаат компаниудын хүрээнд хувьцаа эзэмшигчдийн эрхийн хэрэгжилтийн өнөөгийн байдалд дүн шинжилгээ хийж, цаашид сайжруулах боломж, хэрэгцээг тодорхойлох зорилготой. Тухайлбал, хувьцаа эзэмшигчдийн хуралд оролцож санал өгөх, ногдол ашиг хүртэх, компанийн татан буугдсаны дараах хөрөнгөнөөс хувь хүртэх зэрэг үндсэн эрхүүд хэрхэн хэрэгжиж байгааг судалгаагаар авч үзсэн.
Судалгааны хүрээнд 2020–2024 оны хооронд Монголын хөрөнгийн зах зээлд бүртгэлтэй нээлттэй хувьцаат компаниудын үйл ажиллагаа, эрх зүйн зохицуулалт, Санхүүгийн зохицуулах хорооны хяналт, шүүхийн шийдвэрүүд, зах зээлийн тоон үзүүлэлт зэргийг ашигласан. Мөн ногдол ашиг хуваарилалттай холбоотой зөрчил, мэдээллийн ил тод байдлын дутагдал, шийдвэрийн хэрэгжилтгүй байдал давамгайлж байгааг илрүүлсэн.
Ажлын үр дүнд Монголын санхүүгийн зах зээлд хувьцаа эзэмшигчдийн эрхийн хэрэгжилтэд саад болж буй гол шалтгаануудыг тодорхойлж, эрх зүйн зохицуулалтыг боловсронгуй болгох, компанийн засаглалыг сайжруулах, ил тод байдлыг нэмэгдүүлэх, хувьцаа эзэмшигчдийн оролцоог идэвхжүүлэх зэрэг бодлогын түвшний санал, зөвлөмжүүдийг боловсруулсан.
