Хураангуй:
Цахим худалдаа гэдэг нь техник, технологийн хөгжлийн үр дүнд ухаалаг утас, компьютер, интернэт ашиглан бараа, бүтээгдэхүүнийг худалдан борлуулах үйл ажиллагаа юм. Энэ нь уламжлалт дэлгүүрийн үйл ажиллагааг орлож, хэрэглэгчдэд 24 цагийн турш хялбар, хурдан, зардал багатай, өргөн сонголттой үйлчилгээ үзүүлдэг болсон. Монгол Улсад цахим худалдаа сүүлийн жилүүдэд эрчимтэй өсөж, өдөр тутмын амьдралын салшгүй нэг хэсэг болж байна. Үүний зэрэгцээ цахим худалдаанаас олсон орлоготой холбоотой татварын асуудал улам бүр тулгамдаж байна. Татварын нийтлэг зарчмын дагуу үнэ цэн үүсч буй газар татвар ногдуулах ёстой. Иймд цахим орчноор бараа бүтээгдэхүүн борлуулж буй хувь хүн, аж ахуйн нэгжүүдийн хувьд нэмэгдсэн өртгийн албан татвар (НӨАТ) болон хувь хүний орлогын албан татварыг ногдуулах, бүртгэх, тайлагнах хууль, эрх зүйн зохицуулалтыг боловсронгуй болгох шаардлага бий. Татварын суурь бааз нэмэгдүүлэх, эдийн засгийн ил тод байдлыг хангахын тулд цахим худалдааг зохицуулах хууль эрх зүйн орчныг тодорхой болгох нь чухал юм.
