Хураангуй:
Энэхүү судалгааны ажил нь Монгол Улсад үйл ажиллагаа явуулж буй зочид буудлуудын маркетингийн идэвхжүүлэлтийн стратегийн хэрэгжилт, үр нөлөөг судалж, дижитал хэрэглээ, хэрэглэгчийн зан төлөв, хөрөнгө оруулалтын өгөөж зэрэг үзүүлэлтүүдтэй холбон шинжилсэн болно. Судалгааны зорилго нь зочид буудлын маркетингийн бодлогын өнөөгийн нөхцөл байдлыг үнэлэх, үр дүнг нь хэмжих хэрэгцээ шаардлагыг тодорхойлох, улмаар цаашдын сайжруулалтын стратегийг боловсруулахад оршино.
Судалгааны ажилд Улаанбаатар хот болон аялал жуулчлалын идэвхтэй бүс нутгуудад байрлах 20 зочид буудлыг хамруулсан ба асуулга, баримт бичгийн шинжилгээ, харьцуулсан дүн шинжилгээний аргыг хослуулан ашигласан. Судалгаанд оролцсон зочид буудлууд нь 2-5 одтой зэрэглэлтэй, үйл ажиллагааны туршлагын хувьд ялгаатай ба нийт судалгаанд оролцсон менежер, маркетингийн ажилтнуудын тоо 25 байсан. Асуулга нь Google Form хэлбэрээр хүлээн авсан бөгөөд судалгааны мэдээллийг SPSS болон Excel програм ашиглан боловсруулсан.
Судалгааны үр дүнд дижитал маркетингийн үр ашгийг хэмжих KPI тогтолцоо бүрдүүлэх, өгөгдөлд суурилсан сегментчилэл, хэрэглэгчийн зан төлөвт суурилсан контент хөгжүүлэх, шинэлэг брэнд туршлагыг нэвтрүүлэх зэрэг бодлогын болон практик зөвлөмжүүд боловсруулагдсан.
Тайлбар:
Хурдтай хувьсан өөрчлөгдөж буй дэлхийн эдийн засаг, технологийн дэвшлийн нөлөөгөөр аялал жуулчлалын салбар тэр дундаа зочид буудлын үйлчилгээний зах зээл улам бүр өргөжин тэлж байна. Энэхүү өрсөлдөөнт орчинд зочид буудлууд амжилттай байхын тулд зөвхөн чанартай үйлчилгээ үзүүлэхээс гадна, үр дүнтэй маркетингийн бодлого, стратегийг төлөвлөн хэрэгжүүлэх нь нэн чухал болсон. Зочид буудлын маркетинг нь хэрэглэгчийн хэрэгцээ шаардлагыг судалж, тэдэнд тохирсон үнэ цэнэ бүхий бүтээгдэхүүн, үйлчилгээг сурталчлан таниулах үйл явц юм. Үүний хүрээнд уламжлалт маркетингийн аргуудаас гадна дижитал маркетинг, ногоон маркетинг, туршлага төвтэй хэрэглэгчийн оролцоог чухалчилсан шинэ хандлагууд бий болж байна.
