ХУВЦАС ХУДАЛДАН АВАХ ЭРМЭЛЗЭЛД СОШИАЛ МЕДИА ИНФЛЮЕНСЕРИЙН ҮЗҮҮЛЖ БУЙ НӨЛӨӨЛЛИЙГ ТОДОРХОЙЛОХ СУДАЛГАА

Abstract

Энэхүү судалгааны ажил нь хэрэглэгчийн хувцас худалдан авах эрмэлзэлд үзүүлж буй сошиал медиа инфлюенсерүүдийн нөлөөллийг тодорхойлох зорилготой юм. Орчин үеийн нийгэмд сошиал медиа нь хүмүүсийн харилцаа, мэдээлэл хүлээн авах, худалдан авалт хийх арга барилд гүн гүнзгий нөлөө үзүүлэх болсон. Манай улсад мөн энэ хандлага хүчтэй ажиглагдаж, сошиал медиа хэрэглэгчдийн тоо болон хэрэглээг өдөр тутам нэмэгдэж байна. Судалгаандаа сошиал медиа инфлюенсерийн туршлага, ижил төстэй байдал, танил байдал, тааламжит байдал, бүтээгдэхүүний нийцэл, мэдээллийн чанар болон хэрэглэгчийн худалдан авах эрмэлзэл зэрэг олон хүчин зүйлийн нөлөөллийг судалсан. Судалгааны үр дүнд үндэслэн хувцасны брэндүүд болон маркетингийн агентлагуудад стратегийн зөвлөмж боловсруулах, сошиал медиа платформуудыг үр дүнтэй ашиглах арга замыг тодорхойлохыг зорьсон болно. Судалгааны онолын хэсэгт хэрэглэгчийн зан төлөв, худалдан авалтын шийдвэр гаргах үйл явц, сошиал медиа инфлюенсерийн шинж чанаруудыг нарийвчлан авч үзсэн. Хэрэглэгчдийн хувцас худалдан авах эрмэлзэлд сошиал медиа инфлюенсерийн үзүүлж буй нөлөөллийг тодорхойлохын тулд эхлээд сошиал медиа инфлюенсерт нөлөөлж буй хүчин зүйлсийг судлан түүгээр дамжуулан тэдгээр хүчин зүйлс сошиал медиа инфлюенсерийн үр ашигт хүчин зүйлс болох эсэх мөн хэрэглэгчийн худалдан авах эрмэлзэлд нөлөөлж буй эсэхийг тодорхойлохоор хэд хэдэн судалгааны ажилд үндэслэн, судалгааны загварын хүчин зүйлсээ бүрдүүлсэн. Судалгааны өгөгдлийг цуглуулахдаа асуулгын судалгааны аргыг ашигласан ба нийт 403 өгөгдөл цуглуулан SPSS болон Microsoft excel 2013 программуудыг ашиглан өгөгдлийн шинжилгээ хийсэн болно. Асуулгын судалгааны өгөгдлийг цуглуулах 100 хувь онлайнаар цуглуулсан ба бүтэцлэгдсэн болон хагас бүтэцлэгдсэн асуултуудыг Microsoft Form-д оруулж 7 өдрийн турш өөрийн сошиал медиа хаяг болох Фейсбүүк, Инстаграмдаа стори, пост болгон байршуулсан. Судалгааны эмпирик хэсэгт өгөгдөл цуглуулалт, дүн шинжилгээг хийж, сошиал медиа инфлюенсерүүдийн хувцас худалдан авах эрмэлзэлд үзүүлж буй нөлөөллийг тодорхойлсон. Судалгааны үр дүн хэсэгт найдвартай байдлын шинжилгээ, давтамж, олон хүчин зүйлсийн шинжилгээ, регрессийн шинжилгээг авч үзсэн. Судалгааны үр дүнд сошиал медиа инфлюенсерүүдийн туршлага, бүтээгдэхүүний нийцэл болон тааламжит байдал нь хэрэглэгчийн худалдан авах шийдвэр гаргахад хамгийн чухал хүчин зүйлс болох нь батлагдлаа. Сошиал медиа платформуудын нөлөөг авч үзвэл Facebook болон Instagram нь инфлюенсерийн нөлөөг үр дүнтэй хүргэх үндсэн сувгууд байсаар байна. Facebook болон Instagram платформууд нь хэрэглэгчдэд хүрэх гол суваг болохыг тогтоосон бөгөөд эдгээр платформд анхаарч, маркетингийн стратегийг оновчтой төлөвлөх шаардлагатай байна. Инфлюенсерүүдийн мэдлэг, ур чадвар, бүтээгдэхүүнтэй нийцэл нь хэрэглэгчдийн итгэлийг нэмэгдүүлэх гол хөшүүрэг болохыг харуулж байна. Тиймээс маркетингийн стратегийг инфлюенсерүүдийн чанар, тэдний санал болгож буй бүтээгдэхүүнтэй нийцэх байдлыг тодотгож хөгжүүлэх нь илүү үр дүнтэй байх боломжтой.