Хураангуй:
Аудитын салбарын технологийн дэвшил нь судалгаа шинжилгээний олон боломжийг бий болгосон. Бизнесийн байгууллагуудын технологийн хэрэглээ улам боловсронгуй болж аудиторуудын аудитын ажлын явцад дэвшилтэд технологи, өгөгдлийн аналитикийг ашиглахын зэрэгцээ эдгээр нь үйлчлүүлэгчдэд хэрхэн баталгаа болох талаар шинэ хэрэгцээ гарч ирж байна. Үүний үр дүнд өрсөлдөөний давуу талыг хадгалахын тулд хиймэл оюун ухааныг нэвтрүүлэх замаар аудитын хяналтын чанарыг дээшлүүлэх шаардлагатай болсон.
Энэхүү судалгааны ажил нь хиймэл оюун ухааныг аудитын чанарын хяналтад ашиглах боломжийг судалсан болно. Хиймэл оюун ухаан нь аудитын ажлыг хурдасгаж, зардлыг бууруулан, мэдээллийн үнэн зөвийг нэмэгдүүлэх чухал арга хэрэгсэл болохыг олон улсын компаниудын жишээнүүд харуулж байна.
Хэдий тийм боловч хиймэл оюун ухааны нэвтрүүлэлтэд зарим хүндрэлүүд тулгарсаар байна. Үүнд оруулж байгаа мэдээллийн чанар хангалтгүй, техникийн мэдлэг дутмаг байдал, зардал, аюулгүй байдал зэрэг асуудлууд багтана. Гэсэн хэдий ч компаниуд эдгээр бэрхшээлийг даван туулж, ирээдүйд хиймэл оюун ухааны хэрэглээг илүү өргөн хүрээнд ашиглах төлөвтэй байна.
Энэхүү судалгаа нь аудитын чанарын хяналтыг сайжруулахад хиймэл оюун ухааны чадавхийг судлах нэн чухал хэрэгцээг тодорхойлж, одоо байгаа асуудлуудыг хэрхэн шийдвэрлэх, улмаар аудитын чанарын хяналтыг сайжруулахад хиймэл оюун ухааны үүргийг онцолж, Монголын аудитын салбарт хиймэл оюун ухааны хэрэглээ, үр дүнг сайжруулахад санал, зөвлөмж боловсруулах зорилготой.
Судалгааны зорилгод хүрэхийн тулд аудитын компаниудын хиймэл оюун ухаан нэвтрүүлэлттэй холбоотой судалгааг хийж, тухайн компаниудад хийгдсэн хөндлөнгийн чанарын хяналтын шалгалтын сүүлийн 10 жилийн тайлангийн өгөгдөлд дүн шинжилгээг чанарын үзүүлэлт (RQI) -ээр шинжилж дүгнэлээ.
