Хураангуй:
ТОВЧ ХУРААНГУЙ
Уг судалгаа нь Хөдөлмөрийн аюулгүй ажиллагааны менежментийн талаарх Онолын судалгаанд тулгуурлан Монгол улсын ноос, ноолуурын анхан шатны түүхий эд боловсруулах үйлдвэрийн аюулгүй ажиллагааны менежментийн өнөөгийн байдлыг үнэлж, тулгамдсан асуудлыг тодорхойлон аюулгүй ажиллагааны менежментийг төлөвшүүлэхэд чиглэгдсэн санал зөвлөмж боловсруулсан ажил юм. Ажлын байранд гарсан аливаа аюул эрсдлийн 20% нь аюултай ажлын орчин, 80% нь ажилтнуудын аюултай үйлдэлтэй холбоотой гэж үздэг. Иймээс ажлын орчны аюулгүй байдлыг хангахаас гадна ажилтнуудын зан төлвийг удирдах асуудал чухалд тавигдаж байна. Аюул эрсдлээс хамгаалахад ажилтан нэг бүрийн үүрэг хариуцлага чухал бөгөөд байгууллага аюулгүй ажиллагааны менежментийн тогтолцоог сайн бүрдүүлэх нь нэн чухал юм.
Монгол улсын ноос, ноолуурын анхан шатны түүхий эд боловсруулах үйлдвэрийн аюулгүй ажиллагааны менежментийн өнөөгийн байдлыг аюулгүй ажиллагааны бодлого, аюулгүй ажиллагааны эрсдлийн менежмент, аюулгүй ажиллагааны удирдлагын тогтолцоо, ажилчдын ур чадвар, сургалт, ХЭМАБ дахь ажилчдын оролцоо, дүрэм журам гэсэн 7 бүлэг хүчин зүйлсээр үнэлж дүгнэлт гаргалаа. Судалгааны үр дүнд салбарын байгууллагуудын аюулгүй ажиллагааны бодлого, зорилго нь албан ёсны дүрэм журмаар дэмжигдэн хэрэгжиж байгаа ч мөн доголдолтой засаж сайжруулах талууд ч байна гэж үзсэн. Түүнчлэн аюулгүй ажиллагааны эрсдлийг илрүүлэх, таньж мэдэх, гарсан туршлага сургамжуудыг дараагийн удаа эрсдэл гаргахгүй байхаар ашиглаж сурсан байдал хангалттай түвшинд хүрээгүй байна. Аюулгүй ажиллагааны хяналт дүгнэлтийг сайжруулах, аюулгүй ажиллагааны сургалт хөгжлийн бодлого, манлайлал, хамт олны харилцаа зэргээр дэмжих тал дээр цаашид анхаарах шаардлагатай гэсэн дүгнэлтүүдийг гаргаж, холбогдох зөвлөмжүүдийг боловсруулан гаргалаа.
