Хураангуй:
Үйлдвэрлэлийн болон хүний буруутай үйл ажиллагаанаас үүдэн дэлхийн хэмжээнд байгалийн унаган төрх алдагдах, бохирдох, түүнээс үүсэх хүрээлэн буй орчны хор хөнөөл ихэссэнтэй холбогдон 1980 – аад оноос тогтвортой хөгжил гэсэн ухагдахуун судлагдаж эхэлжээ. 2008 оноос тогтвортой хөгжлийн маркетингийн тухай эрдэмтэд судлаачдын дунд яригдах болсон байна. Маркетингийн тухай ойлголтыг нийгэм, хүрээлэн буй орчны өнцгөөс авч үзэхэд маркетингийн энэ чиглэлийг ногоон маркетинг, хүрээлэн буй орчны маркетинг, экологийн маркетинг гээд олон янзаар нэрлэж байгаа ч сүүлийн үед тогтвортой хөгжлийн маркетинг гэж томьёолж байна. Энэхүү өгүүлэлд тогтвортой хөгжил ба маркетингийн уялдаа холбоо, тогтвортой хөгжлийн маркетингийн үзэл баримтлал нь маркетингийн шинжлэх ухааны шинэ үе болж буй асуудлыг судаллаа. Мөн “Монгол Улсын тогтвортой хөгжлийн үзэл баримтлал - 2030”-д тусгагдсан Улаанбаатар хотын агаарын бохирдол, хорт утааны асуудлыг шийдвэрлэхэд тогтвортой хөгжлийн маркетингийг хэрэглэж байгааг тусгасан болно
