ХУРАЛ, АРГА ХЭМЖЭЭ, ЧУУЛГА УУЛЗАЛТ, ҮЗЭСГЭЛЭНГИЙН (MICE) ТӨВ БАЙГУУЛАХ ТӨСЛИЙН УРЬДЧИЛСАН СУДАЛГАА

Abstract

Энэхүү судалгааны ажил нь Монгол Улсад MICE (Meeting, Incentive, Conference, Exhibition) салбарыг хөгжүүлэх хүрээнд олон улсын хурал, үзэсгэлэнгийн нэгдсэн төв (Convention Center) байгуулах боломж, хэрэгцээ, эдийн засгийн үр ашиг, хэрэгжилтийн нөхцөлийг судлахад чиглэсэн болно. Судалгааны ажлын хүрээнд MICE салбарын онолын үндэс, олон улсын хөгжил, чиг хандлагыг судалж, Монгол Улсын хэмжээнд хурал уулзалт, үзэсгэлэн, арга хэмжээ явуулдаг байгууламжуудын өнөөгийн нөхцөл байдал, зах зээлийн орчинд дүн шинжилгээ хийв. Үүнд үзэсгэлэн, арга хэмжээний өнөөгийн зохион байгуулалт, дэд бүтэц, барилга байгууламжын хүрэлцээ, зах зээлийн эрэлт хэрэгцээг тодорхойлон, SWOT болон PESTLE шинжилгээний аргуудаар гадаад, дотоод орчныг үнэлсэн болно. Мөн олон улсын жишигт нийцсэн MICE төв байгуулах төслийн концепц, байршлын сонголт, хүчин чадлын төлөвлөлт, үйл ажиллагааны бүтэц, үйлчилгээний шийдлийг боловсруулж, уг төслийн санхүү, эдийн засгийн үр ашгийг хөрөнгө оруулалтын тооцоо, орлогын төсөөлөл, NPV, IRR зэрэг үзүүлэлтүүдээр үнэлэв. Түүнчлэн төслийг хэрэгжүүлэх стратеги, удирдлагын бүтэц, түншлэл, үйл ажиллагааны төлөвлөгөөг тодорхойлсон. Судалгааны үр дүнд Монгол Улсад олон улсын стандарт, зориулалт бүхий хурал, үзэсгэлэнгийн нэгдсэн төв байгуулах нь зах зээлийн эрэлт хэрэгцээнд нийцсэн, эдийн засгийн болон нийгэмд үзүүлэх нөлөөллийн хувьд үр ашигтай бөгөөд аялал жуулчлал, бизнесийн орчны хөгжилд эерэг нөлөө үзүүлэх боломжтой гэж дүгнэлээ.