"MASTER OF MARKETING " ХӨТӨЛБӨР БОЛОВСРУУЛАХ ТӨЛӨВЛӨГӨӨ

Abstract

Энэхүү судалгааны ажил нь маркетингийн мастер хөтөлбөрийг олон улсын шилдэг их дээд сургуулиудын жишигт нийцүүлэн, шинжлэх ухаанч түвшинд боловсруулсан иж бүрэн төлөвлөгөө юм. Судалгааны хүрээнд АНУ, Европын орнуудын тэргүүлэх 20 мастерын хөтөлбөрийн бүтэц, хичээлийн агуулга, багц цагийн хуваарилалт, заах арга зүй, төгсөгчдөд олгох мэдлэг, ур чадварын хүрээг харьцуулан дүн шинжилгээ хийсэн. Үүний зэрэгцээ Монгол Улсын хөдөлмөрийн зах зээлийн эрэлт хэрэгцээ, ажил олгогчдын хүлээлт, дотоод сургалтын тогтолцооны өнөөгийн нөхцөл байдлыг тусгасан анхдагч судалгаа хийгдсэн бөгөөд нийт 307 оролцогчоос өгөгдөл цуглуулж боловсруулсан. Үндэслэлтэй дүгнэлтэд тулгуурлан боловсруулсан мастерын хөтөлбөрт дижитал маркетинг, хэрэглэгчийн зан төлөв, дата анализ, стратегийн маркетинг зэрэг сэдвүүдийг гол чиглэл болгон тусгасан бөгөөд заах арга зүйд судалгаанд суурилсан сургалт, компанитай хамтран хэрэгжүүлэх төсөл, кейс анализ, бодит туршлагад тулгуурласан семинар зэрэг орчин үеийн арга барилыг тусгасан. Түүнчлэн олон улсын хүлээн зөвшөөрөгдсөн soft болон hard skills, инновац ба тогтвортой хөгжлийн суурь мэдлэгийг хослуулсан, хууль эрх зүй, боловсролын бодлоготой уялдсан цогц бүтээл болжээ. Энэхүү хөтөлбөр нь Монголын их дээд сургуулиудад нэвтрүүлэх бүрэн боломжтой, өрсөлдөх чадвар өндөр, ирээдүйг чиглэсэн шийдэл болохыг судалгаагаар нотолж байна.