Байгууллагын мэдлэгийн үр дүнтэй менежментэд нөлөөлдөг “орхигдсон” чухал хүчин зүйлс

Abstract

Өнөөгийн мэдлэг ба мэдээллийн эрин зуунд байгууллагууд их хэмжээний мэдлэг ба мэдээллийг шингээсэн бүтээгдэхүүн, үйлчилгээгээр өрсөлдөж, улс орныхоо эдийн засгийн хөгжилд хувь нэмрээ оруулж байна. Тиймээс хувь хүний болон байгууллагын мэдлэгийн аль аль нь байгууллагын стратегийн ач холбогдолтой хөрөнгийн нэг, түүний хязгаарлагдмал нөөцүүдийг үр ашигтай, өгөөжтэй ашиглах, байгууллага дахь янз бүрийн сайжруулалтын зорилт, санал санаачилгуудыг хэрэгжүүлэх үндсэн эх сурвалж, арга замд тооцогдож байна. Энэхүү шинэ чиг хандлага нь байгууллагын менежерүүдийг байгууллагын мэдлэгийг бусад биет хөрөнгийн адил үр дүнтэй удирдахыг шаардаж байгаа юм.

Мэдлэгийн менежмент нь шинэ ойлголт биш юм. (Liebowitz, 2001). Гэхдээ 1990-ээд оноос хойш л эрдэмтэд зөвхөн зориудын, эрчимтэй дэмжлэг, үр дүнтэй менежмент л мэдлэгээсээ үнэ цэнийг бий болгоход нь байгууллагуудад тусалж чадна гэж нотолдог болжээ. Мэдлэгийн үр дүнтэй менежментэд тодорхой хүчин зүйлс нөлөөлдөг. Энэхүү судалгааны ажлын зорилго нь мэдлэгийн үр дүнтэй менежментэд нөлөөлдөг амжилтын чухал хүчин зүйлс (АЧХЗ) дэх орхигдсон хүчин зүйлсийг илрүүлж, тэдгээрийн шинэ цогц загварыг боловсруулахад оршино. Судалгааны үр дүн нь байгууллагынхаа мэдлэгийн менежментийг сайжруулж, хүссэн үр дүндээ хүрэхийг оролдож байгаа мэдлэгийн менежментийн практик хэрэгжүүлэгчдэд үр өгөөж өгөх болно. Түүнээс гадна энэ өгүүлэл нь мэдлэгийн менежментийн амжилтад нөлөөлөх чухал хүчин зүйлсийн талаар илүү ойлголтыг өгч, байгууллагын мэдлэгийн холистик менежментийн цаашдын арга хандлагыг санал болгоно.