Санхүүгийн мэргэжилтнүүдийн зан төлөвийн гажуудал ба хувьцаат компанийн санхүүгийн гүйцэтгэлд үзүүлэх нөлөөлөл

Abstract

Хувь хөрөнгө оруулагчийн болон компанийн санхүүгийн менежерүүдийн шийдвэр гаргалтад мэдрэмж, танин мэдэхүйн гажуудал нь нөлөөлөгч нэг хүчин зүйл юм. Олон улсын судлаачдын үзсэнээр хөрөнгө оруулагч болон санхүүгийн удирдах түвшний менежерүүдийн шийдвэр гаргалтад гажуудлын нөлөө хэр зэрэг, ямар арга замаар нөлөөлж буйг судлан түүнийг бууруулах арга замыг эрэлхийлэх болсон. Энэхүү судалгааны хүрээнд МХБ-ийн ТОП-20 индексэд багтсан санхүүгийн салбарын нийт 10 компанийн санхүүгийн менежерүүдэд ямар гажуудал түгээмэл илэрч байгаа болон илрэхгүйг олон улсад судлагдсан асуулгын аргаар илрүүлж, компанийн санхүүгийн гүйцэтгэлд нөлөөлж буй эсэхийг шинжилсэн. Үүний тулд 2023-2024 оны хагас жилийн ТОП-20 индексэд багтсан санхүүгийн салбарын компаниудын тайлан дээр тодорхой харьцаа үзүүлэлтүүдийн тооцооллыг ашиглан регрессийн шинжилгээ, фактор шинжилгээг нийт компанийн хувьд болон компани тус бүрийн дата дээр тулгуурлан хийсний үр дүнд санхүүгийн шинжээчдэд алдагдлаас зайлсхийх, сүргийн болон хэт их итгэлтэй байдлын гажуудлууд түгээмэл илэрч байна. Энэхүү судалгааны үр дүнгээр, зан төлөвийн гажуудлууд нь санхүүгийн шийдвэр гаргалтад тодорхой хэмжээгээр нөлөөлж байгаа бөгөөд эдгээр нөлөөллүүдийг ойлгож, бууруулах нь санхүүгийн байгууллагын гүйцэтгэлийг сайжруулахад нөлөөтэй юм.