Хураангуй:
Зах зээлийн шударга өрсөлдөөн нь бизнес эрхлэгчдэд өсөн дэвжих боломжийг олгодог бол хэрэглэгчдэд сонголт хийх давуу талыг бий болгодог ач холбогдолтой. Таны худалдан авалт хийж буй аливаа бүтээгдэхүүн бүрийн ард өрсөлдөөний эрх зүйн хууль тогтоомжоор зохицуулагдсан харилцаа явагдаж байдаг. Манай улсын хувьд өрсөлдөөний эрх зүйн харилцааг зохицуулагч гол хууль нь 2010 онд батлагдсан “Өрсөлдөөний тухай” хууль юм. Уг хуулиар өрсөлдөөнд харшлах олон төрлийн үйл ажиллагаануудыг нарийвчлан зааж өгсөн байдаг. Тэдгээрээс “Төрийн захиргааны байгууллага, нутгийн өөрөө удирдах болон нутгийн захиргааны байгууллагаас өрсөлдөөнийг хязгаарлахыг хориглох” харилцааг онцгойлон энэхүү судалгааны ажлаар судалсан болно. Өөрөөр хэлбэл зах зээлийн чөлөөт өрсөлдөөнд төрийн захиргааны байгууллагаас оролцох нь онол болон практикийн хувьд ямар үр нөлөө үзүүлдэг талаар судалж эдийн засгийн харилцаан дахь эрх зүйн суурь яагаад чухал болох ач холбогдлыг тодорхойлсон болно.
