Хураангуй:
Бизнесийн байгууллагууд нь өнгөрсөн хугацаанд зөвхөн сайн бүтээгдэхүүн үйлчилгээ гарган түүнийгээ олон тоогоор борлуулахад анхаардаг байсан бол сүүлийн жилүүдэд харилцагчдынхаа эрэлт хэрэгцээнд нийцүүлэн оновчтой байдлаар, зардлаа хэмнэн бизнесээ төлөвлөх, зохион байгуулах бодлого хэрэгжүүлэх болсон. Дээрх байдлаар ажиллаж буй байгууллага нь харилцагч төвтэй бодлогыг хэрэгжүүлэхийг зорьж байгаа гэж үзэж болох бөгөөд энэ нь тухайн компанийг урт хугацаанд тогтвортой, ашигтай үйл ажиллагаа явуулах боломжийг бий болгож байдаг.
Монголын банкны салбарт харилцагч төвтэй болох зорилгыг Голомт банк 2017 онд зарласнаар харилцагч төвтэй банкнуудын эхлэлийг тавьсан байдаг. Үүнээс хойш системийн нөлөө бүхий банкнууд мөн адил өөрсдийн бизнес загварыг харилцагч төвтэй болгоход чиглүүлж эхэлсэн.
Өнөөдрийн байдлаар аль банк харилцагч төвтэй бизнес загварыг хамгийн сайн хэрэгжүүлж чадсаныг хэмжихийн тулд тэдний бүтээгдэхүүн үйлчилгээ болон борлуулалтын сувгуудад харилцагч сэтгэл ханамжтай байгаа эсэхийг судалж үзэх шаардлагатай байна.
Энэхүү судалгаа нь харилцагч төвтэй банкны тухай онол, салбарын тойм, энэ чиглэлийн судлагдсан байдал, судалгааны арга зүй, судалгааны үндсэн хэсэг, эмпирик судалгаа шинжилгээ, дүгнэлт болон зөвлөмж гэсэн хэсгээс бүрдсэн болно.
