Эрдэнэт хотын Нэгдсэн эмнэлгийн эрүүл мэндийн даатгалын санхүүжилтэд тулгамдаж буй асуудлыг шийдвэрлэх нь

Abstract

Улс орон оршин байх үндэс нь ард иргэд бөгөөд үүнийгээ дагаад иргэдийн эрүүл мэнд нэн тэргүүнд тавигдах чухал асуудлуудын нэг юм. Иргэд эрүүл мэндийн тусламж үйлчилгээг тодорхой хязгаарлалтгүй, санхүүгийн бэрхшээлгүй авахыг хүсэх бөгөөд засгийн газар, эрүүл мэндийн яам зэрэг удирдах дээд байгууллагууд иргэдийнхээ эрүүл мэнд, түүнтэй холбогдон гарах санхүүгийн эрсдлийг хуваалцахыг зорьдог. Эрүүл мэндийн даатгалын тогтолцоог нэвтрүүлсэн гол зорилго нь өвчин эмгэгтэй болж үүнээсээ үүдэн хөдөлмөрийн чадвар алдах, өрхийн орлого багасах санхүүгийн ямар нэгэн эрсдэл учрах холбоотойгоор эмнэлгийн тусламж үйлчилгээний зардал, эмийн үнэ зэргийг хөнгөлөн иргэддээ дэмжлэг туслалцаа үзүүлэх явдал юм. Монгол улсын эрүүл мэндийн салбар сүүлийн жилүүдэд өөрчлөлт шинэчлэл хийж байгаагийн нэг нь эрүүл мэндийн тусламж үйлчилгээ үзүүлж буй байгууллагууд эрүүл мэндийн даатгалын сангаас 100% гүйцэтгэлээрээ санхүүждэг болсон явдал юм. Иргэд авч буй эрүүл мэндийн тусламж үйлчилгээндээ сэтгэл хангалуун, үйлчилгээ үзүүлж буй байгууллага чанартай үйлчилгээ үзүүлснээр тухайн тусламж үйлчилгээний зардлыг эрүүл мэндийн даатгалын санд зарах юм. Иймээс эрүүл мэндийн даатгалын сангаас хэрхэн санхүүжүүлдэг, түүнд тулгамдаж буй асуудлуудыг шийдвэрлэх хэрэгцээ шаардлага үүсэж байна. Иргэдийн эрүүл мэндтэй холбоотой гардаг эмчилгээ үйлчилгээний зардал түүний хэмжээ, нэгдсэн эмнэлгийн эрүүл мэндийн даатгалын сангаас санхүүжиж буй өнөөгийн байдал түүнд тулгамдаж буй асуудлуудыг судлан, шийдвэрлэх арга замыг тодорхойлсон болно.