"Си Юү" конвениенс дэлгүүрээр үйлчлүүлэгчдийн сэтгэл ханамжийн судалгаа

Abstract

Монгол улс, Улаанбаатар хотод 2018 оноос хойш үйл ажиллагаагаа амжилттай явуулж буй томоохон сүлжээ дэлгүүр болох “Си Юү” конвениенс дэлгүүрээр үйлчлүүлэгчдийн сэтгэл ханамжийг судаллаа. Тус сүлжээ дэлгүүр нь одоогоор 110 салбартайгаар үйл ажиллагаагаа явуулж байгаа бөгөөд өдөрт 55 мянган үйлчлүүлэгчид хүрч, өөрсдийн бэлэн боловсруулсан хүнсний үйлдвэрт Ширхэгийн хоол, Савласан хоол, Гүн хөлдөөсөн бүтээгдэхүүн зэрэг 3 төрлийн бэлэн боловсруулсан хүнсийг чанарын шаардлага хангасан орчинд үйлдвэрлэн, өглөө бүр шинээр нь хэрэглэгчийн гарт хүргэж байгаа юм. Мөн цар тахлын энэ үед хүргэлтийн үйлчилгээгээ нэвтрүүлсэн нь компанийн үйл ажиллагаанд түлхэц болж байгаа билээ. Жижиглэнгийн худалдааны дэлгүүрээр үйлчлүүлэгчийн сэтгэл ханамжийг судлахад Хэрэглэгчийн туршлага, Хэрэглэгчийн хүлээлт, Хэрэглэгчийн үйлчилгээ, Үйлчилгээний чанар түүнийг хэмжих аргачлал зэргийг судлан үзэж, Хэрэглэгчийн туршлагын хянагдах боломжтой хүчин зүйлс болох Үйлчилгээний чанар, Бүтээгдэхүүний чанар, Дэлгүүрийн дотоод орчин, Бүтээгдэхүүний үнэ, Дэлгүүрийн бодлого зэрэг 5 элементийг сонгон авч асуулга боловсрууллаа. Энэ бүхний үр дүн Хэрэглэгчийн сэтгэл ханамж, Үнэнч байдал, зэрэгт нөлөөлнө гэж таамаглал дэвшүүлэн судаллаа. Түүнчлэн брэндийн цэвэр идэвхжүүлэлтийн оноог тооцож гаргав.