Хураангуй:
Энэхүү мастерын судалгааны ажлын зорилго нь аялал жуулчлалын салбарт тулгамдаж буй асуудлуудыг илрүүлэн оролцогч талуудыг тодорхойлон түншлэлийн тусламжтайгаар Горхи Тэрэлжийн бүс нутгийг хөгжүүлэх боломжит хувилбарыг санал болгоход оршино.
Аялал жуулчлалын салбар нь дэлхий дахинд өргөжин тэлж, хурдацтай өсч буй салбар юм. Иймээс Монгол улсад аялал жуулчлалыг тэргүүлэх чиглэлийн эгнээнд тавьж бодлого, эрх зүйн орчны хүрээнд тодорхой ажлуудыг үе шаттайгаар хийж байна. Гэвч жуулчдыг татах дэд бүтэц хангалттай сайн хөгжөөгүй, оролцогч талуудын түншлэл сул, жуулчдад үзүүлэх бүтээгдэхүүн, үйлчилгээний чанар муу зэрэг шалтгааны улмаас жуулчдын тоо хангалттай өсөхгүй байна. Энэхүү судалгааны ажлын хүрээнд аялал жуулчлалын салбарын оролцогч талуудын түншлэлийг Горхи Тэрэлжийн бүс нутгийн жишээн дээр судалсан.
Уг судалгааны ажил нь үндсэн 4 бүлгээс бүрдэнэ. Эхний бүлэгт Түншлэл түүнтэй холбоотой онол арга зүй, түүний судлагдсан байдлын судалгааг хийсэн. Энэ хүрээнд Түншлэл түүний зорилго, шинж чанарыг нь тайлбарлах суурь онолууд болох байгууллага хоорондын харилцааны онол, түншлэл зах зээл болох онол, нөөцөд тулгуурласан онол, нөөцөөс хамаарсан онол, байгууллагуудын түншлэл онол, оролцогч талуудын онол зэргийг судалсан.
II-р бүлэгт Монголын аялал жуулчлалын салбарт оролцогч талуудын өнөөгийн байдлыг нарийвчлан судалсан. Энэхүү бүлэгт салбарын өнөөгийн улс төрийн бодлого, хууль эрх зүй, зах зээлийн төлөв байдал, оролцогч талуудын чадавх зэргийг судалсан.
Дараагийн бүлэгт Горхи Тэрэлжийн бүс нутаг дахь аялал жуулчлалын салбар дахь оролцогч талуудын түншлэлийн нөхцөл байдал ямар байгааг эмпирик судалгааны үр дүн дээр тулгуурлан дүн шинжилгээ хийсэн. Энэ бүлэгт оролцогч талуудын түншлэлийн хамтын ажиллагааны хөгжил, идэвх оролцоо, хамтрах сонирхол, үр ашиг, хүндрэл бэрхшээл зэргийг судалж гаргахыг зорьсон.
Сүүлийн бүлэгт эмпирик хийгдсэн судалгаа, шинжилгээний үр дүн дээрээ тулгуурлан Горхи Тэрэлжийн бүс нутаг дахь аялал жуулчлалын салбарт оролцогч талуудын түншлэлийг хөгжүүлэх хувилбарыг санал болгосон. Ингэхдээ BSR-ын оролцогч талуудын хамтын ажиллагааны стратеги загварыг ашигласан.
