Хураангуй:
Санхүү эдийн засгийн их сургууль нь Эко грийн арт ХХК-тай хамтран 2011 оноос хойш санаачлан хэрэгжүүлж байгаа Монгол, Орос, Хятад гурван улсын хооронд эх байгаль, нүүдлийн уламжлалт соёл, аж төрөх ёсны харилцан шүтэлцээнд суурилсан тогтвортой аялал жуулчлалыг хөгжүүлэх олон улсын төслийн хүрээнд байгуулагдаж буй жуулчны баазад зориулан хоол үйлдвэрлэл хэсгийн төлөвлөлт хийнэ. Байгаль эх, ард олныхоо уламжлалт амьдралыг хамгаалан дэлгэрүүлэхдээ аялагч болон хөрөнгө оруулагчдын эрх ашгийг ямагт эрхэмлэх зорилготой бүтээн байгуулагдаж байна. Завхан аймгийн Яруу, Эрдэнэхайрхан, Завханмандал, Ургамал, Сантмаргаз сумдын нутагт байрлах Бор хяр элсэн манханы байгалийн тогтоц, говь хээрийн байгалийн экосистем, түүнд зохицсон хөрс, ургамал, амьтад, бичил уур амьсгалын таатай нөхцөлд түшиглэн төсөл хэрэгжүүлж байна.
Бор хярын элсэн манханы газарзүйн онцлог нь: зүүн урдаас баруун хойшоо сунан тогтсон нийт 180 гаруй км урт, /хамгийн өргөн хэсэг нь 15 км урт/, далайн түвшнээс дээш 450м өргөгдсөн, нийт талбайн хэмжээ 2500км2 цуваа элсэн манхан. Говь хээрийн бүсд тогтсон эл газар нь хангайн дэд мужаас эхлээд говь хээр, хээр, цөлөрхөг хээрийн бүсүүдийг дамнан оршдогоороо бусад элсэн манханаас ялгаатай, төв Азийн гадагш урсгалгүй их нууруудын хөндийн томоохон гол, нууруудын экосистемээс тогтсон маш өвөрмөц байгалийн хан бүрдэл юм.
Жуулчны баазын хоол үйлдвэрлэх хэсгийн стандартыг судалж үүнд нийцсэн үйлдвэрлэл, үйл ажиллагааны процессийн зураглал хийн шаардардах тоног төхөөрөмжийг үнэ болон түүнд нөлөөлөх хүчин зүйлсийн хамт харьцуулсан судалгаа хийсэн болно.
