Хураангуй:
Энэхүү судалгааны ажлын хүрээнд орон сууцны санхүүжилтийн компани (ОССК)-ийн ипотекийн зах зээлд гүйцэтгэх үүрэг, ач холбогдлыг тодорхойлж, ипотекийн зээлийн хүртээмжийг нэмэгдүүлэх боломжийг эрэлхийлэв.
Орон сууцны зах зээлийн судалгаагаар дунд болон дундаас доош орлоготой өрхийн орон сууцны эрэлт өндөр байгаа ч түүнд тохирсон үнэ, талбайтай орон сууцны нийлүүлэлт бага гэж гарсан бол ипотекийн зах зээлийн судалгаагаар санхүүжилт дутагдалтай байгаагаас иргэд зээлд хангалттай хамрагдаж чадахгүй байна гэж дүгнэсэн.
Энэхүү асуудлыг цогцоор шийдэхүйц хоорондоо уялдаа холбоо бүхий урьдчилгаа төлбөрийн даатгал, зээл холбосон өрийн бичиг, барьцаат үнэт цаас гэсэн гурван бүтээгдэхүүнийг нэвтрүүлэх боломжийн талаар судалгааны ажилдаа тусгалаа.
Урьдчилгаа төлбөрийн даатгал: 30%-ийн урьдчилгаа төлбөрийг төлөх чадамжгүй иргэдэд, ялангуяа дунд болон дундаас бага орлоготой болон залуу гэр бүлүүдэд тохирсон бүтээгдэхүүн;
Зээл холбосон өрийн бичиг: банкуудаар дамжуулан тодорхой нөхцөлтэй зээл олгуулж, түүнийг эргүүлэн худалдан авах хэлцэл
Барьцаат үнэт цаас: ипотекийн зээлийн санхүүжилтийг бүрдүүлэх зорилготой ба худалдан авсан багцаар үнэт цаас гаргаж санхүүжилтийн тасралтгүй тогтолцоог бий болгох бүтээгдэхүүн юм.
Эдгээр бүтээгдэхүүнийг амжилттай нэвтрүүлбэл ипотекийн санхүүжилтийн тогтолцоог зах зээлийн зарчмаар бий болгож, ипотекийн зээлийн хүртээмж нэмэгдүүлж, агаарын болон хөрсний бохирдлыг бууруулж чадах юм.
