Хураангуй:
“Чөлөөт бүсийн тухай Монгол Улсын хууль”-нд “чөлөөт бүс” гэж гаалийн татвар болон бусад татварын хувьд гаалийн нутаг дэвсгэрийн гадна оршиж байгаад тооцогдох, аж ахуйн үйл ажиллагааны тусгай дэглэм бүхий Монгол Улсын нутаг дэвсгэрийн хэсгийг ойлгоно” гэж заажээ.
Монгол Улсын УИХ-ын 1995 оны 87 дугаар тогтоолоор баталсан чөлөөт бүс байгуулах үзэл баримтлалд чөлөөт бүс байгуулж, хөгжүүлэх үйл ажиллагааг бодит хүчин зүйл, угтвар нөхцөл, шалгуурыг үндэслэн сонгож авсан тодорхой бүсүүдийн статусыг тухай бүрт нь хуулиар тогтоон мөрдүүлэх замаар хэрэгжүүлнэ гэж заасан байдаг. Гэтэл чөлөөт бүс байгуулахаар тогтсон бүс нутгуудад дэд бүтцийн асуудал шийдэгдээгүй, хууль эрх зүйн болон үйл ажиллагаа явуулах таатай орчин бүрдээгүй, гадаадын хөрөнгө оруулагчидтай гэрээ хэлцэл хийгдээгүй байхад эдийн засгийн болон худалдааны чөлөөт бүс байгуулахаар шийдвэрлэсэн байдаг. Өөрөөр хэлбэл, Монгол Улсад чөлөөт бүс байгуулж хөгжүүлэх үзэл баримтлалд дурдсан зарчим, онцлог, бодит хүчин зүйл, угтвар нөхцөлийг харгалзалгүйгээр бүсүүд байгуулж, төсвийн хөрөнгийг зарцуулсан боловч үйл ажиллагаа нь зогсонги байдалд орсон байна.
