Хураангуй:
Монголын төрийн албыг хөгжүүлэхэд тулгамдаж буй олон асуудал байгаа бөгөөд өөрчлөлт шинэчлэл хийх, боловсронгуй болгох хүлээлт нийгэмд бий болоод багагүй хугацаа өнгөрч байна. Өнөө цагт мэргэшсэн тогтвортой төрийн алба, түүний хараат бус байдал, төрийн албаны стандарт, төрийн албаны ёс зүй, төрийн үйлчилгээг тэгш хүртээмжтэй болгох гэх мэт тулгамдсан асуудлууд шийдлээ хүлээсээр байна. Монгол Улсын Үндсэн хууль болон Төрийн албаны тухай, Авлигын тухай, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай Монгол Улсын хууль, Төрийн захиргааны албан хаагчийн ёс зүйн дүрэм зэрэгт төрийн алба хаагчийн ажиллах үндсэн зарчим, эрх үүрэг, ёс зүйн талаар заасан байна. Гэтэл сүүлийн жилүүдэд төрийн эрх бүхий албан тушаалтнаас төрийн чиг үүргийг хэрэгжүүлэхдээ эрх мэдлээ хэтрүүлэх, авлига авах зэргээр ёс зүйгүй хандлага гаргасаар байгаа нь нууц биш бөгөөд энэ нь төрийн албаны хөгжилд саад болж байна. Иргэдээс төрийн алба хаагчийн ёс зүйн талаар хийсэн судалгаанд иргэдийн ердөө 11 хувь нь төрийн алба хаагчийн ёс зүйг сайн гэж үздэг, тал илүү хувь нь хангалтгүй гэсэн бол 40 хүрэхгүй хувь нь дунд зэрэг гэж дүгнэжээ. Төрийн алба хаагчийн ёс зүйг үнэлсэн иргэдийн үнэлгээ нь уг асуудал нэлээд анхаарал татсан, тулгамдсан болохыг харуулж байгаа бөгөөд энэхүү сэдвийг гүнзгийрүүлэн судлах шалтгаан болж байгаа юм
