Хураангуй:
Сүүний нөөц байгаа боловч үйлдвэрлэл улирлын чанартай, өрхийн гар ажиллагаатай үйлдвэрлэл давамгайлсаар байна. Сүү бэлтгэн нийлүүлэх тогтолцоо алдагдаж, сүүг үйлдвэрлэлийн түвшинд 10 %-тай боловсруулж байна. Монгол улсын хүн амын талаас илүү хувь нь хот суурин газар амьдарч, хүн амын 65 хувийг 35 хүртэлх насны залуучууд эзэлж байгаа нь органик сүү, тараг, зайрмаг, аарц зэрэг боловсруулж савласан сүүн бүтээгдэхүүний хэрэглээ нэмэгдэх үндэслэл болох хэдий ч зах зээлд импортын сүү, сүүн бүтээгдэхүүн зонхилж байгаагаас хотын хүн ам хөдөөгийнхөөс 2.5-3.7 дахин бага сүү хэрэглэж байна.
Судалгааны ажлын зорилго нь Монгол улсын сүүний салбарын өрсөлдөх чадварын зарим асуудлыг судалж, тэдгээрийг сайжруулах арга замыг тодорхойлоход оршино.