Хураангуй:
Үүрэн холбооны салбарын нарийн мэргэжлийн инженер, техникийн ажилтнуудын байгууллагадаа үнэнч байх хандлагад карьер хөгжил, ажлын байрны стресс, ажил амьдралын тэнцвэр хэрхэн хамааралтайг тодорхойлж, түүгээр дамжуулан хандлагыг сайжруулах арга зам боловсруулах нь судалгааны ажлын гол зорилго юм. Хамрах хүрээний хувьд мэдээлэл, харилцаа холбооны салбарын дэд салбар болох мэдээлэл, холбооны салбарын (цаашид үүрэн холбоо гэх) хүрээнд хийгдсэн ба үүрэн холбооны оператор компаниудын 125 инженер, техникийн ажилтнуудаас судалгааг авсан болно.
Үүрэн холбооны салбарын инженер, техникийн ажилтнууд бол компанийн стратегитай шууд холбогддог, чухал ажлын байр юм. Сүлжээний тоног төхөөрөмжийн хэвийн найдвартай ажиллагааг хангаж, инженерийн чухал шийдлүүдийг гарган, оновчтой бүтээн байгуулалтыг хийдэг, баз станц, холбооны байр цамхагийн бүрэн бүтэн, найдвартай байдал болон үүрэн холбооны сүлжээний найдвартай хэвийн ажиллагааг хангаж, гэмтэл сааталгүй байлгах, хэрэглэгчдэд найдвартай үйлчилгээг хүргэхэд харилцаа холбооны инженерүүд чухал үүрэгтэй. Нөгөө талаас хэрэглэгчийн хувийн мэдээлэл, бүртгэл, төлбөр тооцоо, системийн нууцлал хамгаалал, аюулгүй байдал өндөр түвшинд хамгаалагдсан байх ёстой учир үүнийг хангаж ажилладаг мэдээллийн технологийн инженерийн ажлын байр мөн чухал юм. Иймд харилцаа холбооны инженер болон мэдээллийн технологийн инженерийн ажлын байр бол энэ салбарын түлхүүр албан тушаал юм. Түлхүүр албан тушаалтнуудаа компани тогтвортой ажиллуулснаар зах зээлд өрсөлдөх чадвараа хадгална.
Байгууллагадаа үнэнч байх хандлагын талаар онол арга зүйн судалгааг хоёрдогч эх үүсвэрээс судалж, мөн ажлын байрны стресс, карьер өсөлт, ажил амьдралын тэнцвэр гэсэн хүчин зүйлүүдийг авч үзэв.
Судлаачийн зүгээс эдгээр хүчин зүйлүүд байгууллагадаа үнэнч байх хандлага /БҮБХ/-д эерэг хамааралтай гэсэн таамаг дэвшүүлсэн. Таамаг батлагдаж эерэг хамааралтай гэж гарсан ч хамаарлын хүч сул байна. Ажилтнуудын байгууллагадаа үнэнч байх хандлага ерөнхийдөө дунджаас өндөр хувьтай гарсан, түүнд нь Ажлын байрны стресс, Карьер өсөлт хоёр илүү хамааралтай байна.
Энэхүү судалгааны ажлыг хийснээрээ онол арга зүйн судалгааг хэрхэн хийх, хоёрдогч эх үүсвэрээс баримт бичгийн аргаар хэрхэн судалгаа хийх, асуулга анкетыг хэрхэн боловсруулах арга замыг мэдэж авлаа. Түүнчлэн судалгааны загвар, дизайныг оновчтой тодорхойлох, судалгааг авахдаа хэрхэн үр дүнтэй авахыг судлаач зайлшгүй тооцоолох ёстой юм. Үр дүн боловсруулалт, шинжилгээг судалгааны spss20 програм ашиглан боловсруулсан ба статистикийн утгуудыг судалж мэдсэн билээ.
