Хураангуй:
Агаарын тээврийн салбарт өрсөлдөөн нэмэгдэж буй нөхцөлд өрсөлдөх чадвараа дээшлүүлэх, зах зээлд эзлэх хувиа өсгөх, түүнийг хадгалах, үйлчилгээгээрээ өрсөлдөх асуудал агаарын тээврийн компаниудын өмнө тулгамдаж байна. Энэ асуудлыг шийдэхийн тулд олон улсын нислэгийн үйлчилгээний чанарын түвшинг хэмжих, чанартай үйлчилгээ үзүүлж байгаа агаарын тээврийн компанийг тодорхойлох шаардлагатай. Иймээс Монгол улсад олон улсын нислэгийн үйлчилгээ үзүүлж байгаа агаарын тээврийн компаниудын үйлчилгээний чанарын түвшинг харьцуулан судалж, үйлчилгээний чанарыг дээшлүүлэх талаар санал зөвлөмж боловсруулах зорилгоор энэхүү судалгааны ажлыг хийлээ.
Онолын болон салбарын судалгаа хийхдээ анхдагч болон хоёрдогч эх сурвалж дээр үндэслэн баримт бичгийн болон харьцуулалтын аргыг ашигласан. Онолын судалгаанд үндэслэн үйлчилгээний чанар сэтгэл ханамжийн эмпирик судалгааны загварыг санал болгосон. Эдгээр загваруудын дагуу үйлчилгээний чанарын хүлээлт, бодит үйлчилгээний үнэлгээ болон сэтгэл ханамжийн хамааралтай холбоотой таамаглалуудыг шалгалаа. агаарын тээврийн салбарын үйлчилгээний чанарыг хэмжих загваруудын талаар онол арга зүйн үүднээс судалж, тохиромжтой загварыг боловсрууллаа. Агаарын тээврийн салбарт тохируулсан үйлчилгээний чанарыг хэмжих SERVQUAL загвараар МИАТ, Эйр Чайна, Корэйн Эйр, Аэрофлот, Туркиш Эйрлайнc агаарын тээврийн компаниудын үйлчилгээний чанарыг тодорхойлов. Хэрэглэгчийн судалгааг онлайн болон цаасан хэлбэрээр авч, нийт 246 хүн хамрагдлаа.
Судалгааны ажлын үр дүнд дэвшүүлсэн 6 таамаглалаас 4 таамаглал батлагдаж, 2 таамаглал батлагдаагүй. Бодит үйлчилгээний үнэлгээ, сэтгэл ханамжийн үнэлгээ хоорондоо мэдэгдэхүйц эерэг хамааралтай гэдэг таамаглал батлагдсанаар цаашид хэрэглэгчийн сэтгэл ханамжийг дээшлүүлэхийн тулд агаарын тээврийн компаниуд үйлчилгээний чанарын бодит үнэлгээг нэмэгдүүлэх арга хэмжээ авч хэрэгжүүлэх практик ач холбогдолтой юм. Мөн олон улсын нислэгийн үйлчилгээний чанарын харьцуулсан судалгаанаас салбарын бенчмаркинг гарч үүнийг агаарын тээврийн компаниудын үйлчилгээний чанарын түвшинг тодорхойлсон болно. Ийнхүү харьцуулсан судалгааны үр дүнд үндэслэн салбарын хэмжээнд болон агаарын тээврийн компаниудын хэмжээнд цаашид авч хэрэгжүүлэх үйлчилгээний чанарыг сайжруулах, хадгалах талаар санал зөвлөмжийг боловсруулав. Агаарын тээврийн компаниуд нь санал болгож буй үйлчилгээний чанарыг хэмжих загварыг үйл ажиллагаандаа хэрэглэх, үйлчилгээний чанарыг сайжруулахтай холбоотой санал зөвлөмжийн дагуу өрсөлдөх чадвараа дээшлүүлэх, хэрэглэгчийн сэтгэл ханамжийг дээшлүүлэх бодлого, арга хэмжээг авч хэрэгжүүлэх боломжтой гэж үзэж байна.
