Хураангуй:
Энэхүү дипломын ажил нь Олон улсын эрүүгийн шүүхийн хэрэг хянан шийдвэрлэх
ажиллагаа, эрүүгийн хариуцлагын тогтолцооны эрх зүйн үндсийг судалж, тэдгээрийг
Монгол Улсын эрүүгийн эрх зүйн зохицуулалт болон олон улсын эрх зүйн үүрэгтэй
харьцуулан шинжлэхэд чиглэнэ. Олон улсын эрүүгийн шүүх нь хүн төрөлхтний эсрэг гэмт
хэрэг, дайны гэмт хэрэг, түрэмгийллийн гэмт хэрэг болон геноцид зэрэг олон улсын хамтын
нийгэмлэгийн ашиг сонирхолд ноцтой хохирол учруулах гэмт хэргийг мөрдөн шалгах, гэм
буруутай этгээдэд эрүүгийн хариуцлага хүлээлгэх үндсэн чиг үүргийг хэрэгжүүлдэг. Энэхүү
тогтолцооны эрх зүйн суурийг Ромын дүрэм бүрдүүлдэг бөгөөд Монгол Улс уг дүрэмд
нэгдэн орсноор дотоодын хууль тогтоомжоо олон улсын эрүүгийн эрх зүйн нийтээр хүлээн
зөвшөөрөгдсөн зарчим, хэм хэмжээнд нийцүүлэх үүрэг хүлээсэн.
Судалгааны хүрээнд Олон улсын эрүүгийн шүүхийн харьяалал, хэрэг хянан
шийдвэрлэх ажиллагааны үндсэн зарчим, эрүүгийн хариуцлагын тогтолцоог шинжилж,
Монгол Улсын Эрүүгийн хууль болон Монгол Улс, Оросын Холбооны Улсын хооронд
байгуулсан эрх зүйн туслалцааны гэрээний холбогдох зохицуулалттай харьцуулан судлав.
Судалгаанд түүхчилсэн, харьцуулсан эрх зүй, системчилсэн шинжилгээний аргыг
ашигласан болно.
Судалгааны үр дүнд Монгол Улсын эрүүгийн хууль тогтоомжид Ромын дүрмийн
харьяалах үндсэн гэмт хэргүүдийн эрх зүйн зохицуулалтыг тусгасан хэдий ч, олон улсын
эрүүгийн эрх зүйн зарим зарчим, тухайлбал хөөн хэлэлцэх хугацааг үл хэрэглэх болон албан
тушаалын дархан эрхийг үл харгалзан эрүүгийн хариуцлага хүлээлгэх асуудлаар цаашид
боловсронгуй болгох шаардлага байгааг тогтоосон. Мөн олон улсын эрүүгийн эрх зүйн
хүрээнд хүлээсэн үүрэг болон хоёр талт эрх зүйн туслалцааны гэрээний хэрэгжилтийн
уялдаа холбоог боловсронгуй болгох шаардлагатай талаар дүгнэлт, зөвлөмж боловсруулав.
