Монголд хөгжүүлэхэд тохиромжтой хувийн хөрөнгө оруулалтын сангийн хэлбэрийг тодорхойлох нь

Abstract

Мэргэжлийн хөрөнгө оруулагчдид тодорхой хаалттай хүрээнд хөрөнгө татан төвлөрүүлэн, богино болон дунд хугацаанд хөрөнгө оруулалт хийснээр хөрөнгийн зах зээлийн үйл ажиллагааг идэвхжүүлж, улс орны санхүүгийн секторт хүчтэй нөлөө, жижиг дунд үйлдвэрлэлийн хөгжилд чухал дэмжлэг үзүүлэх хөшүүрэг нь болж өгөх ач холбогдолтой.

Жижиг дунд үйлдвэрлэлийн хөгжлийн эхний шатанд яваа манай орны хувьд санхүүгийн хувьд чадавх муутай маш олон тооны аж ахуйн нэгжүүд байна. Төр засаг, олон улсын байгууллага, санхүүгийн байгууллага сүүлийн жилүүдэд жижиг, дунд үйлдвэрлэлийн санхүүжилтийн хэмжээг ихээр нэмэгдүүлж байгаа хэдий ч зээл авах эрэлт их хэвээр байна. Энэ нь манай улсын жижиг, дунд үйлдвэрлэлүүдэд бодитой дэмжлэг үзүүлэхэд санхүүгийн арга хэрэгслүүд нь зохих түвшинд хүрч хөгжөөгүй байгаатай холбоотой юм.

Нутриал Трейд Трейд ХХК-ийн кейс жишээн дээр венчур капитал болон зээлийн санхүүжилтийг үнэлж үзэхэд венчур сангийн хөрөнгө оруулалт нь үйлдвэрлэлийн байгууллагуудын дундаж өгөөжөөс өндөр өгөөж өгч, дунд хугацаанд эх үүсвэрийг нөхөх бололцоотойг харуулж байна.

Жижиг дунд үйлдвэрлэлийн санхүүжилтэнд тулгарах хүндрэл, хөрөнгө оруулалтын эрэлт хэрэгцээг венчур сангийн хөрөнгө оруулалтаар шийдвэрлэх бодит боломж байгаа нь хувийн хөрөнгө оруулалтын сангийн үйл ажиллагаа хөгжихөд чухал нөлөөтэй юм.

Хувийн хөрөнгө оруулалтын сан, тэр дундаа венчур сангийн үйл ажиллагаа нь тулгамдаж буй дээрх асуудлыг шийдвэрлэхэд чухал хөшүүрэг, тохиромжтой шийдэл байх боломжтой нь судалгааны үр дүнд гарсан тул венчур санг ойрын дунд хугацаанд монголд хөгжүүлэхэд тохиромжтой хувийн хөрөнгө оруулалтын сангийн хэлбэр мөн гэж үзсэн болно.