Хураангуй:
Сүүлийн жилүүдэд Монгол Улсын банкны салбар хурдацтай өөрчлөгдөж, дижитал шилжилт, өрсөлдөөн, хэрэглэгчийн хүлээлтийн өсөлт нь банкны үйл ажиллагаанд гүнзгий нөлөө үзүүлж байна. Банк хоорондын өрсөлдөөн ширүүсэж, хэрэглэгчийн итгэлцэл, сэтгэл ханамж, үнэнч байдал нь банкны урт хугацааны амжилтыг тодорхойлох чухал хүчин зүйлс болсон. Энэхүү судалгаа нь Монголын иргэдийн банкны хэрэглэгчдийн банк солих буюу шилжих зан төлөвт нөлөөлж буй хүчин зүйлсийг системтэйгээр судлах зорилготой юм. Судалгаа нь хэрэглэгчдийн шийдвэр гаргалтад нөлөөлдөг үйлчилгээний чанар, үнийн шударга байдал, итгэлцэл, брэндийн нэр хүнд, сурталчилгааны санал, солих зардал, албадан солих, амлалт, өнгөрсөн зан төлөв, зар сурталчилгааны өрсөлдөөн зэрэг хүчин зүйлсийг шинжилж, эдгээрийн харилцан нөлөөг Push-Pull-Mooring (PPM) загвар дээр тулгуурлан тайлбарласан болно.
Судалгааны суурь үндэслэл нь Монголын банкны зах зээлд хэрэглэгчийн солих үзэгдэл нэмэгдэж, олон хүмүүс хэд хэдэн банк ашиглаж байгаа хэдий ч энэ үзэгдэлийн нөлөөлөл, механизмын талаар эмпирик судалгаа дутмаг байгаа явдал юм. Тиймээс энэхүү судалгаа нь тухайн үзэгдлийг онол болон практикийн аль аль түвшинд нарийвчлан судалж, банкны хэрэглэгч хадгалах стратегийн арга замыг тодорхойлох зорилготой.
Энэхүү докторын диссертаци нь 5 хэсэгтэй бөгөөд дараах бүтэцтэй:
•
Удиртгал - Судалгааны хамрах хүрээ, зорилго, асуултууд арга зүй, ач холбогдлыг тодорхойлно.
•
Бүлэг 1. Хэрэглэгчийн солих зан төлөвийн онолын үндэслэл - Хэрэглэгчийн зан төлөв, үйлчилгээний чанар, итгэлцэл, сорилт, үнэнч байдлын талаарх дэлхийн болон бүс нутгийн судалгааг шүүмжлэн тоймлон авч үзсэн. Push-Pull-Mooring ба TPB онолд тулгуурласан загвар боловсруулж таамаглал дэвшүүлнэ.
•
Бүлэг 2. Судалгааны арга зүй - Судалгааны философи, загвар, өгөгдөл цуглуулах арга, түүвэр, шинжилгээний аргачлалыг тодорхойлно.
•
Бүлэг3. Үр дүн ба шинжилгээ хэлэлцүүлэг - Судалгааны өгөгдлийн статистикийн дүнг танилцуулж, таамаглалуудыг шалгана. Үр дүнг онол болон өмнөх судалгаануудтай харьцуулан тайлбарлана.
•
Дүгнэлт ба санал зөвлөмж - Судалгааны гол ололт, практик болон бодлогын үр нөлөөг дүгнэж, ирээдүйн судалгааны чиглэлийг санал болгоно.