Хураангуй:
Монгол улс нь өнөөдрийн байдлаар зөвхөн нүүрс, зэс, алт зэрэг газрын шавхагддаг баялгийг олборлож эдийн засгаа хөгжүүлэхийг зорьж байна. Гэвч бидэнд энэ өргөн уудам газар нутагт ашиглаж болох маш олон байгалийн баялаг байдаг. Үүний нэгээхэн хэсэг нь сэргээгдэх эрчим хүчний эх үүсвэр буюу нар, салхи, ус, газрын гүнийн дулаан зэрэг юм. Монгол оронд сэргээгдэх эрчим хүчний төслүүд эхнээсээ хэрэгжиж эхлээд байгаа бөгөөд энэ талын хууль эрх зүйн асуудал шийдэгдэж эдгээр эх үүсвэрүүдийг ашиглан баялгийг бий болгох нөхцөл боломж бүрдээд байгаа. Сэргээгдэх эрчим хүчийг ашиглах нь байгаль экологийн тэнцвэрт байдлыг хадгалаад зогсохгүй дэлхий нийтийн асуудал болоод байгаа хүлэмжийн хийг бууруулах ач холбогдолтой. Мөн энэ эх үүсвэрийг ашигласнаар эдийн засагт үзүүлэх нөлөөллөөс гадна шинэ техник технологийг нэвтрүүлж хөгжингүй орнуудын туршлага ноу-хоа өөрийн хөрсөнд нутагшуулах боломжтой. Иймд сэргээгдэх баялгаар эрчим хүч үйлдвэрлэж өнөөгийн тулгамдаад байгаа эрчим хүчний асуудлыг шийдэх боломж бололцоо байгааг энэхүү ажлаараа харуулахыг зорив.
