Хураангуй:
Энэхүү дипломын ажил нь мөнгө угаах гэмт хэргийн эрх зүйн зохицуулалт,
зүйлчлэлийн онцлог болон тулгамдсан асуудлыг Монгол Улсын эрүүгийн эрх зүйн хүрээнд
судалж, холбогдох хууль тогтоомжийг олон улсын жишигт нийцүүлэн боловсронгуй болгох
санал, зөвлөмж боловсруулахад чиглэгдсэн.
Судалгааны онолын хэсэгт мөнгө угаах гэмт хэргийн үүсэл хөгжил, олон улсын
хэмжээнд авч буй онолын үзэл баримтлал, түүний эрх зүйн зохицуулалтыг НҮБ-ын
конвенцууд болон ФАТФ-ийн зөвлөмжийн хүрээнд авч үзсэн. Монгол Улсын 2015 оны
Эрүүгийн хуульд мөнгө угаах гэмт хэргийн зүйлчлэлийг олон улсын стандарттай
уялдуулсан боловч практикт хэрэгжүүлэх явцад тулгарч буй хүндрэл, эрх зүйн
зохицуулалтын тодорхой бус байдал зэрэг асуудлууд байгааг тодорхойлсон.
Судалгааны хэсэгт Гадаад орнуудын мөнгө угаах гэмт хэрэгтэй тэмцэх эрх зүйн
зохицуулалт, хяналт шалгалтын механизм, практик туршлагыг Монгол Улсын нөхцөлтэй
харьцуулан судалж, хяналтын тогтолцоо, шүүхийн шийдвэр гаргах практикийг нарийвчлан
шинжилсэн. Монгол Улсын хувьд мөнгө угаах гэмт хэргийн зүйлчлэл нь хэт ерөнхий,
практикт хэрэгжүүлэхэд бэрхшээлтэй, хууль сахиулах байгууллагуудын хамтын ажиллагаа,
чадавх сул, шүүхийн шийдвэр гаргах үйл явцад нэг мөр ойлголт дутагдалтай байна. Эдгээр
дутагдал нь ФАТФ-ийн шаардлагыг бүрэн хангахад саад болж, эдийн засаг, санхүүгийн
тогтолцоонд эрсдэл үүсгэх нөхцөл болж байна.
Судалгааны үр дүнд Гадаад улс орнуудын Эрүүгийн хууль болон Дэлхийн эрүүгийн
загвар хуулийн зүйлчлэлийн аргачлалыг Монгол Улсад нэвтрүүлэх боломжтойг тогтоосон.
Зөвлөмжид мөнгө угаах гэмт хэргийн зүйлчлэлийг нарийвчлах, шүүхийн практикийг нэг
мөр болгох, хяналт шалгалтын байгууллагуудын чадавхийг сайжруулах, олон улсын
байгууллагуудтай хамтын ажиллагааг эрчимжүүлэх саналуудыг багтаасан. Эдгээр нь мөнгө
угаах гэмт хэрэгтэй тэмцэх эрх зүйн орчныг боловсронгуй болгох, санхүүгийн системийн
тогтвортой байдлыг хангахад чухал хувь нэмэр оруулна гэж үзсэний үүднээс энэхүү
судалгааны ажлыг хийлээ
