БАЙГАЛЬ ОРЧИН, НИЙГЭМ ЗАСАГЛАЛЫН ШАЛГУУР ҮЗҮҮЛЭЛТҮҮД НЬ КОМПАНИЙН ҮНЭЛГЭЭНД ҮЗҮҮЛЭХ НӨЛӨӨ (Ус ундаа үйлдвэрлэгч компанийн жишээн дээр)

Abstract

Уур амьсгалын өөрчлөлт, байгаль орчны бохирдол, нөөцийн хомсдол зэрэг дэлхий нийтийн сорилтууд нь зөвхөн Монголд бус олон улсад ч тулгамдсан асуудал болж байна. Үүнтэй уялдан бизнесүүд байгаль орчин, нийгэмд үзүүлэх сөрөг нөлөөгөө бууруулах, тогтвортой үйл ажиллагаа явуулах шаардлагатай тулгарч байна. Нүүрстөрөгчийн ялгаруулалтыг бууруулах, хог хаягдлыг зөв зохицуулах, хөдөлмөрийн аюулгүй байдал, хүний эрхийг хамгаалах зэрэг нь бизнесийн салшгүй хэсэг болжээ.

Иргэд, хэрэглэгчид, хөрөнгө оруулагчид компаниудаас ил тод, хариуцлагатай байхыг шаардаж байгаа бөгөөд энэ шаардлагыг биелүүлээгүй тохиолдолд байгууллагууд нэр хүнд, харилцагч, хөрөнгө оруулагчдаа алдах эрсдэлтэй байдаг. Иймд сүүлийн жилүүдэд Байгаль орчин, Нийгэм, Засаглалын (БОНЗ/ESG) асуудал нь хөрөнгө оруулалтын шийдвэр гаргалтад чухал нөлөөтэй болсон байна. Энэхүү судалгаагаар ESG үнэлгээний арга зүй, байгууллагуудын онцлогийг судалж, Монголын ус, ундаа үйлдвэрлэгч компанийн жишээн дээр ESG үнэлгээний нөлөөг тодорхойлохыг зорьсон болно.