Эцэг эх байх эрхийг хязгаарлах, хасах хуулийн зохицуулалт, харьцуулсан судалгаа

Abstract

Эцэг, эх байх эрхийг хязгаарлах, хасах нь хүүхдийн эрх, ашиг сонирхлыг хамгаалах зорилгоор хууль тогтоомжид заасан арга хэмжээ юм. Энэхүү судалгааны ажлаар эцэг, эхийн эрхийг хязгаарлах, хасахтай холбоотой Монгол улсын хууль, эрх зүйн зохицуулалтыг онол, шүүхийн практикт тулгуурлан гүнзгийрүүлэн судалсан. Монгол улсын Хүүхдийн эрхийн тухай хууль болон Гэр бүлийн тухай хуулиудад хүүхдийн эрх зөрчигдсөн тохиолдолд хариуцлага тооцох, хүүхэд хамгааллын үйлчилгээ үзүүлэх, эцэг эхийн эрх, үүрэгтэй холбоотой харилцааг тодорхой зохицуулж өгсөн байдаг. Гэвч эцэг, эхийн эрхийг хязгаарлах болон хасахтай холбоотой заалтууд нь агуулгын хувьд хэт ерөнхий, нийтлэг шинжтэй байгаагаас үүдэн шүүхийн практикт эргэлзээтэй, ойлгомжгүй байдал үүсгэж холбогдох шүүхийн шийдвэрүүд өөр өөр гарч байгаа бөгөөд эцэг эх байх эрхийг хязгаарлах, эрхийг нь буцаан сэргээх шийдвэр цөөн, шууд эрх хасах тохиолдол түгээмэл байгаа юм Тиймээс энэхүү сэдвийн хүрээнд сүүлийн 5 жилийн хугацаанд гарсан эцэг эх байх эрхийг хязгаарлах, хасахтай холбоотой шүүхийн шийдвэр, статистик тоон мэдээлэлд дүн шинжилгээ хийж, ХБНГУ, Япон, БНСУ-ын хууль эрх зүйн зохицуулалттай харьцуулан судалгаа хийсэн болно.