Хураангуй:
Аливаа улс орны эдийн засгийн үр ашигт байдалд санхүүгийн системийн гүйцэтгэх үүрэг нэн чухал байдаг. Түүний дотор санхүүгийн байгууллага буюу банкны салбар нь нийт эдийн засгийн мөнгөн урсгалын 90% гаруй хувийг эзэлдэг буюу иргэд, байгууллага төрийн байгууллагуудын санхүүгийн харилцааг зохицуулж зуучлах чухал үүргийг гүйцэтгэнэ. Иймд магистрын судалгаагаараа Монгол Улсын банкны салбаруудын үйл ажиллагааны эрсдэлээс урьдчилан сэргийлэх боломж арга замын талаар судалсан болно. Энэхүү судалгаа нь банкны ажилтан, мэргэжилтнүүдийн үзэл бодолд дүн шинжилгээ хийх замаар эдгээр эрсдлийг бууруулах үр дүнтэй стратегийг тодорхойлох зорилготой юм. Үйл ажиллагааны эрсдэлийн удирдлагын талаарх өнөөгийн туршлага, бодит үйл явдлуудын талаарх анхдагч мэдээлэл цуглуулах зорилгоор асуулга боловсруулж, банкны салбаруудын ажилтнуудаас бөглүүлсэн. Түүнчлэн үйл ажиллагааны эрсдэлтэй холбоотой тулгамдсан асуудал, шийдлүүдийн талаар илүү гүнзгий ойлголттой болох үүднээс банкны салбарын 7 мэргэжилтэнээс /тус бүр арав гаруй жил банкны салбарт үйл ажиллагаа явуулсан/ ярилцлага хийсэн.
Энэхүү судалгаа нь дотоод залилан, кибер аюулгүй байдлын аюул занал, зохицуулалтын нийцлийн асуудал, үйл ажиллагааны алдаа, хэрэглэгчийн үйлчилгээний асуудал, бие махбодийн аюулгүй байдлын асуудал, технологийн доголдол зэрэг үйл ажиллагааны эрсдэлд нөлөөлж буй гол хүчин зүйлсийг онолын судлагаандаа тусгасан болно. Судалгааны үр дүнгээс харахад хатуу дотоод хяналтыг хэрэгжүүлэх, кибер аюулгүй байдлын дэвшилтэт арга хэмжээнд хөрөнгө оруулалт хийх, зохицуулалтыг дагаж мөрдөх тасралтгүй сургалт, ердийн ажлуудыг автоматжуулах, харилцагчийн үйлчилгээний сайжруулсан сургалт, биет аюулгүй байдлын хяналт, гамшгаас хамгаалах иж бүрэн төлөвлөгөө гаргах зэрэг нь эрсдэлийг үр дүнтэй удирдахад чухал ач холбогдолтой юм.
Мөн тус судалгаанд Монголын банкны салбарын үйл ажиллагааны эрсдэлийн удирдлагын өнөөгийн байдал, Монголын банкуудад тулгарч буй тодорхой сорилтуудын талаар дүн шинжилгээ хийсэн. Тодорхой дэвшил гарсан хэдий ч банкны салбарын үйл ажиллагааны тогтвортой, үр ашигтай байдлыг хангахын тулд сайжруулах шаардлагатай зүйлүүд байсаар байгааг судаллаа. Энэхүү дипломын ажил нь практик зөвлөмжийг өгч, эрсдэлээс урьдчилан санал зөвлөмж гаргаж банкны үйл ажиллагааны эрсдэлийн удирдлагын талаар үнэ цэнтэй зөвлөмж гаргалаа.
