Хүүхдийн тэтгэлэг гаргуулах тухай шүүхийн шийдвэрийг албадан биелүүлэх ажиллагааны онцлог, эрх зүйн зохицуулалтыг боловсронгуй болгох нь

Abstract

Энэхүү дипломын ажил нь хүүхдийн тэтгэлэг гаргуулах тухай шүүхийн шийдвэрийг албадан биелүүлэх ажиллагааны онцлог, тулгарч буй асуудлууд, эрх зүйн зохицуулалтын өнөөгийн байдлыг судалж, сайжруулах боломжуудыг тодорхойлох зорилготой. Судалгааны хүрээнд Монгол Улсын холбогдох хууль тогтоомж, олон улсын гэрээ конвенц, эрх зүйн зарчим, практик жишээнүүдийг шинжлэн судалсан. Тус ажилд хүүхдийн эрхийг хамгаалах, эцэг эхийн үүргийг хэрэгжүүлэхэд шүүхийн шийдвэрийг албадан биелүүлэх үйл ажиллагааны үр нөлөөг дээшлүүлэх арга замуудыг онцгойлон авч үзсэн. Үүнд, хариуцагчийн хөрөнгийг илрүүлэх, ажил эрхлэлтийн байдлыг тодорхойлох, биелэлтэд хяналт тавих зэрэгт тулгарч буй бэрхшээлүүдийг хөндөж, хууль эрх зүйн зохицуулалтыг боловсронгуй болгох, олон улсын сайн туршлагыг судлан үзсэний үндсэн дээр өөрийн саналуудыг дэвшүүлсэн. Судалгааны үр дүнд хүүхдийн тэтгэлэгтэй холбоотой шүүхийн шийдвэрийг албадан биелүүлэх ажиллагааг үр дүнтэй, шударга байдлаар хэрэгжүүлэхийн тулд эрх зүйн орчныг сайжруулах шаардлагатайг дүгнэсэн. Үүнд, хуулийн зохицуулалтыг тодорхой болгох, хэрэгжилтийг хангах механизмыг бэхжүүлэх, олон нийтийн ойлголт, хандлагыг сайжруулах шаардлагатай гэж үзсэн болно.