Монголын хөрөнгийн зах зээл дээр хөрөнгө оруулагчийн хандлагын индексийг тооцох арга зүйн судалгаа

Abstract

Энэхүү судалгааны хүрээнд Хөрөнгийн зах зээл дээр тооцоологддог “Хөрөнгө оруулагчийн хандлагын индекс”-ыг гадны улсын жишээн дээр хэрхэн тооцдог, тухайн хөрөнгийн зах зээлийн өгөөжид үзүүлэх нөлөөлөл хэр байдгыг тодруулах замаар уг индексийг Монгол Улсын Хөрөнгийн зах зээл дээр тооцоолох боломжтой эсэхийг судалсан. Цаашлаад Монгол улсын Хөрөнгийн зах зээлийн шинж чанартай холбогдуулаад ямар арга замаар тооцоолбол зохимжтой хийгээд хөрөнгө оруулагчдад, нийт салбарын хэмжээнд үр өгөөжтэй байхыг тодорхойлох эрмэлзэлтэй ажил юм. Цаашлаад Монголын хөрөнгийн зах зээлд оролцогчдын хандлагыг тооцоолсноор зах зээлд оролцогчдыг арилжаанд оролцоход ашигладаг шинжилгээний нэгэн арга хэрэгсэл болгох, салбарынханд зах зээлийн богино хугацаан дахь хөрөнгө оруулагчдын байр суурийг таниулах боломжийг олгох зорилгоор хийж гүйцэтгэсэн. Мөн Монголын зах зээлийн онцлог байдал, хэмжээ, хөгжлийн түвшин, дэд бүтцийн нөхцөл байдлаас хамааруулж Хөрөнгө оруулагчийн хандлага тооцоолох шууд арга буюу асуулгын аргаар тооцох аргазүйг ашигласан ба ингэхдээ АНУ-ын Хөрөнгийн зах зээлд хүлээн зөвшөөрөгдөөд буй AAII (American Association of individual investors) байгууллагын асуулгын судалгаанд үндэслэн судалгааг хийсэн.