Хураангуй:
Монгол Улсын Боловсролын Ерөнхий хуулийн 2023 оны шинэчилсэн найруулгаар “эндаументын сан” гэх ойлголт Монгол улсад хэрэглэгдэх болсон бөгөөд тус сан нь байгууллага, аж ахуйн нэгжийг санхүүгийн нэмэлт эх үүсвэрээр хангах зорилготой. Эндаументын сан нь олон зуун жилийн түүхтэй бөгөөд дэлхийн шилдэг их, дээд сургуулиуд уг санг байгуулсан байдаг ба сангийн хөрөнгө болон өгөөжийн хэмжээ хэдэн арван тэрбум доллараар хэмжигддэг байна. Эндаументын сан гэх ойлголт нь дан ганц боловсролын байгууллагад хамааралтай ойлголт биш бөгөөд бусад чиглэлийн байгууллагууд мөн тус санг байгуулах боломжтой. Олон улсад тус санг байгуулах, үйл ажиллагааг тасралтгүй явуулах эрх зүйн орчинг бүрдүүлсэн байдаг бол Монгол Улсад эндаументын санг үүсгэн байгуулах, үйл ажиллагаа тогтвортой явуулах, тайлагналаар хангах зэргийг зохицуулах эрх зүйн орчинг бий болгоход чиглэн олон талын судалгаа шинжилгээ хийх зайлшгүй шаардлагатай байгаа болно. Ингэснээр, санхүүгийн зах зээлд хөрөнгө оруулалт хийхэд урьдчилан таатай орчинг бий болгох, эндаументын санд хандив өргөх иргэд, аж ахуйн нэгжийн тоог нэмэгдүүлэх зэрэг ач холбогдолтой.
