Хураангуй:
Байгууллагын хувьд хамгийн чухал нөөц юу вэ? Тэр бол мэдлэг ба мэдлэгтэй ажилтнууд бөгөөд аливаа байгууллагын амжилт болон тогтвортой хөгжлийн гол хөшүүрэг юм. Эдийн засгийн хөгжил, орчны хурдацтай өөрчлөлт нь мэдлэгийг зөвхөн үнэлэх биш, аливаа байгууллага, хамт олон, нийгмийн дунд хэрхэн мэдлэгийг бүтээх, ашиглах, дамжуулах, хадгалах зэргээр мэдлэгийн менежмент гэх ойлголтыг өргөн цар хүрээтэй болгожээ. Мэдлэгийн менежмент нь байгууллагын нөөцийн ашиглалтыг яаж үр дүнтэй, үр ашигтай болгож амжилтанд хүрч болоход анхаарлаа хандуулж байна. Сүүлийн жилүүдэд бизнесийн орчны хувьсамтгай чанар ихэссэнээр олон хүчин зүйлийн нөлөөнд орших, эс оршихын хүнд бөгөөд хатуу шалгуур нь асуудал болж байна. Иймээс биет болон биет бус нөөцийн, ил болон далд мэдлэгийн хэрэглээг зөв удирдаж, үнэ цэнийг бий болгох нь судлаач эрдэмтдийн, бизнес эрхлэгчдийн нэг зорилго болсон.
Энэхүү судалгааны ажлын хүрээнд мэдлэгийн менежментийн үндсэн ойлголт, түүхэн хөгжил, эх сурвалжуудыг судалж, түүний оновчтой хэрэглээг амьдралд нэвтрүүлэх, хэрэглээг нэмэгдүүлэх боломжийг онолын түвшинд судаллаа.
Үүний үндсэн дээр мэдлэгийн менежментийг амжилттай хэрэгжүүлэхэд нөлөөлөгч хүчин зүйлсийг тодруулахад энэхүү онолын судалгааны зорилго оршино.
