Хураангуй:
Нийгэм, байгаль орчны өөрчлөлт, улс төрийн нөхцөл байдал, техник технологийн хурдтай хөгжилөөс шалтгаалан манай улсын хүн амын стрессийн түвшин өндөр буйг илэрхийлсэн тоо баримтууд нилээдгүй байна. Бидний амьдарч буй өнөөгийн нийгэмд байнгын өндөр ажлын ачаалал, амжилт гаргаж карьераа дээшлүүлэх хүсэл, ажлаа алдахгүй байх айдас зэргээс хамаараад өөрт байгаа бүхий л хүч чадлаа шавхан цаг наргүй ажиллах явдал ажиллагсадын хувьд энгийн үзэгдэл болсон байна. Ийм нөхцөлд хүмүүс стрессд орох нь элбэг бөгөөд байгууллагууд ажилтаны стресс, түүнээс гарах үр нөлөөнөөс бодит болон бодит бус алдагдал хүлээдэг болохыг эрдэмтэд баталсан байна. Энэхүү судалгааны ажлын зорилго нь ажлаас хамаарах стрессийг онолын түвшинд судлах бөгөөд эрдэмтэн судлаачдын энэ чиглэлийн бүтээлүүдтэй он цагийн хэлхээсээр танилцаж судалгааны хандлагуудын нэгдсэн зураглал гаргах хэлбэрээр бичигдсэн болно.
