КОМПАНИ НЭГТЭХ ҮЙЛ АЖИЛЛАГААНЫ (COMPANY MERGER) ЭРХ ЗҮЙН ЗОХИЦУУЛАЛТ (ХАРЬЦУУЛСАН СУДАЛГАА)

Abstract

Өнөөгийн дэлхий дахинд компани нэгтгэх үйл ажиллагаа нь компаниудын хурдацтай өсөж тэлэх, шинэ зах зээлд нэвтрэх, бүтээгдэхүүн үйлчилгээгээ төрөлжүүлэх болон зах зээлд эзлэх хувь хэмжээг нэмэгдүүлэх гэх мэт бизнесийн боломжоо нэмэгдүүлэх, цаг хугацаа хэмнэх аргуудын нэг болоод байгаа билээ. Он жил өнгөрөх тусам компани нэгтгэх үйл ажиллагаа нь улс орнуудын компаниа тэлэх сонгодог аргуудын нэг болоод байгаа тул энэхүү судалгааны ажил нь Монгол Улсын хууль тогтоомж болон бусад улсын хууль тогтоомж, АНУ-ын жишээн дээр харьцуулагдан хийгдсэн болно. Компани нэгтгэх нь олон шатлалтай үйл ажиллагаа ба салбар бүрийн дүгнэлт болон шинжилгээнүүдийн үр дүнд бий болох томоохон үйл ажиллагаа юм. Уг үйл ажиллагаа нь хууль эрх зүйгээс гадна татвар, санхүү бүртгэл гэх асуудлуудыг хамардаг тул зөвхөн эрх зүйн үүднээс хийсэн судалгаа болохыг дурдах нь зүйтэй. Энэхүү судалгааны ажлын нэгдүгээр бүлэг буюу онолын хэсэгт компани нэгтгэх үйл ажиллагаа гэж юу болох, түүний хэлбэр ангилал, үүсэл хөгжил болон гадаад орнуудын төрөл ангилал болон түүхэн үүслийг авч үзсэн. Харин хоёрдугаар бүлэг буюу судалгааны хэсэгт компани нэгтгэх үйл ажиллагааны эрх зүйн орчны судалгааг дотоодын жишээндээр болон гадаад оронтой харьцуулан авч үзсэн болно.