Хураангуй:
Тикси дижитал ХХК нь арга хэмжээ зохион байгуулагчид болон оролцогч талуудыг саадгүй холбох, үйлчилгээ авах зориулалттай үүлэнд суурилсан технологийн стартап компани юм. Уг компани нь tixy нэртэй платформыг зах зээлд нэвтрүүлэхээр ажиллаж байгаа бөгөөд үйл ажиллагааны чиглэл нь төрөл бүрийн арга хэмжээ, тоглолтын тасалбарын онлайн борлуулалт юм. Зах зээлд нэвтрэх хугацааны хувьд энэ оны 2 дахь хагас гэж төлөвлөсөн. Түүнтэй холбоотойгоор зах зээлд өөрсдийгөө таниулах маркетинг хийх, хэрэглэгчдээ тодорхойлж тэднийг татах зэрэг маркетингийн төлөвлөлт, төлөвлөгөө шаардлагатай. Учир нь тус зах зээлийн хувьд жил ирэх тусам хэрэглэгчдийн тоо нэмэгдэж байгаа салбар бөгөөд өрсөлдөгч компаниудын хувьд өөр хоорондоо ялгарах, борлуулалын тоогоо нэмэхэд маркетингийн арга хэрэгсэл нь гол үүрэг гүйцэтгэх юм.
Энэхүү судалгааны ажлын гол зорилго нь Тикси платформын гол хэрэглэгчдийг олох, тэдэнд зориулагдсан маркетингийн төлөвлөгөөг боловсруулж, бусад өрсөлдөгчдөөс ялгарах ялгаралыг бий болгоход оршино. Нөхцөл байдлын шинжилгээ буюу 5-СИ шинжилгээг боловсруулан хэрэглэгчийн судалгааг хийсэн ба судалгаанаас үндэслэн хэрэглэгчийн персонаг тодорхойлсон. Энэхүү маркетингийн төлөвлөгөөгөөрөө зөвхөн Тикси дижитал ХХК-аас гадна бусад технологи дээр суурилсан цахим худалдан авалтын платформ хөгжүүлэгч компаниудыг нийгэмд таниулах төлөвлөгөө болгон ашиглах боломжтой.
