Фитнес төвөөр үйлчлүүлэгчдийн үнэнч байдалд нөлөөлөх хүчин зүйлсийн судалгаа

Abstract

Хэрэглэгчийн үнэнч байдал нь өнөөгийн өрсөлдөөнт бизнесийн орчинд амжилтын чухал түлхүүрүүдийн нэг юм. Хэрэглэгчийн үнэнч байдал нь хэрэглэгчийн сэтгэл ханамжтай мөн хамааралтай байдаг. Хурдацтай хөгжиж буй эрүүл мэнд, фитнесийн салбарын үйлчлүүлэгчдийн үнэнч байдал мөн сэтгэл ханамжид нөлөөлж буй хүчин зүйлс, тэр дундаа фитнес мэргэжилтэний ур чадвар болон үйлчилгээний орчны нөлөөг судлах зорилготой тус судалгааг хийв. Судалгааг Улаанбаатар хотод үйл ажиллагаа явуулж буй салбар бүхий Чийрэг Монгол, Golden Gym фитнес төвийн нийт 360 үйлчлүүлэгчээс “Google Forms” цахим талбарыг ашиглан асуулга хэлбэрээр авсан. Анхдагч өгөгдлийг боловсруулан хүчин зүйл, корреляци болон регрессийн шинжилгээ хийсэн. Судалгааны үр дүнд фитнес төвийн мэргэжилтнүүдийн ур чадвар болон фитнес төвийн орчин нь хэрэглэгчийн сэтгэл ханамж, үнэнч байдалд ихээхэн нөлөөлдөг үр дүн гарав. Тус судалгааны дүгнэлтүүд фитнес үйлчилгээ үзүүлэгчдэд эерэг сэтгэгдэл бүхий орчинг бүрдүүлж, чадварлаг фитнес мэргэжилтнүүдийг ажиллуулах замаар үйлчлүүлэгчдийг татах, хадгалахад тусална.