Хураангуй:
1944 онд нийгэмших чадвар муутай бүлэг хүүхдийг дүрсэлснээр Аспергерийн хам шинж гэх ойлголт анх бий болж байжээ. Харьцангуй залуу Аутизмын хүрээний эмгэг гэх ойлголт нь одоо болтол зарим улс орнуудын нийгэмд хангалттай байдлаар танигдаагүй хэвээр байгаа бөгөөд жил ирэх тутамд хурдацтайгаар өссөөр байна. Монгол улсын хэмжээнд СЭМҮТ-д 2022 онд оношлуулсан хүүхдийн тоо 746 байсан бол 2021 онд 276 хүүхэд оношлуулж байсан. Энэ нь харьцуулалт хийхэд 2.7 дахин их өссөн үзүүлэлттэй байгаа юм. АХЭ-ийн талаар судалсан баримт, мэдээлэл, статистиктай судалгааны ажил одоогийн байдлаар Монгол Улсын хэмжээнд хийгдээгүй байгаа төдийгүй нийгэм Аутизм бол өвчин гэж хүлээж авдаг эсвэл энэ нэр томьёог огт мэддэггүй нь дийлэнх хэсэг болон Даун Аутизмыг нэг эмгэг хэмээн боддог хэсэг бүлэг байдаг (Монголын аутизмын холбоо, 2022) гэх буруу ойлголттой байна. Мөн АХЭ-ийн талаар нийгмийн маркетингийн ажлууд бага хийгдсэн, танигдаж чадаагүй, зөвхөн зорилтот бүлэгтээ хүрдэг. Тиймээс АХЭ-ийг нийгэмд таниулах зайлшгүй шаардлагатай гэж үзэн аутизмын хүрээний эмгэгтэй хүүхдүүдийн амьдралын чанарт нөлөөлж буй хүчин зүйлсийн хамаарлыг судлан, гарсан дүгнэлт тоо баримт дээр тулгуурлан нийгмийн маркетингийн санаа боловсруулсан. Амьдралын чанарын хамаарлыг судлахдаа нийт 175 АХЭ-тэй хүүхэдтэй эцэг эхчүүдээс асуулгын аргаар судалгааг аван, IBM SPSS Statistic 23, Microsoft Excel 2016 программын тусламжтайгаар үр дүнг боловсруулав.
