Хураангуй:
Соёл бол үндэсний дархлаа үнэт зүйлийн нийлбэр. Орчин үед хүүхэд залуус барууны соёлд хэт уусаж, өв соёл, уламжлал түүхээ сайн мэдэхгүй байгаагаас Монгол дархлаа аюулд орж байна. Тэд чөлөөт цагаа үр бүтээлтэй өнгөрүүлэхгүй, интернэт орчинд хэт автаж байна. Бидний хойч ирээдүйн хөгжил зарим талаар доголдож, тэдэнд үүх түүх, өв соёл, зан заншил, ёс уламжлалаа мэдэх, эх орноороо бахархах үзэл дутагдаж байна.
Үүнтэй холбоотойгоор хүүхэд залуусыг соёл, урлагаар дамжуулан хүмүүжүүлж, төлөвшүүлж, тэдэнд үүх түүх, үндэс угсаа, эх орноороо бахархах үзлийг бий болгон соён гэгээрүүлэх, орчин үеийн технологи, инновацад тулгуурлан эдийн засгийн эргэлтэд оруулах зорилготойгоор соёлын үйлчилгээг нэгтгэсэн соёл платформын үйлчилгээг нэвтрүүлэх “Монгол үндэсний дархлаа ба эдийн засагт нөлөөлөх “СОЁЛ” төсөл” хэрэгжиж байгаа юм.
Тус дипломын ажлын хүрээнд зорилтот насныхан буюу 16-22 насны залуусын соёлын үйлчилгээнд хандах хандлага (Музейн үзвэрийн жишээн дээр) -ийг судлан, судалгааны үр дүн дээр үндэслэн соёл, тэр тусмаа музейн үзвэр үйлчилгээг залууст таниулах кампанит ажлын төлөвлөгөөг боловсруулан ажилласан болно.
