Хураангуй:
Унтах шаардлага нь өлсөхтэй төстэй бөгөөд нойргүйдэлтэй болон нойр алдсан хүн нь маш хурдан ядралд ордог байна. Унтах нойрыг зөвхөн 1-2 цагаар хорогдуулахад биеийн эрүүл мэндэд муугаар нөлөөлөөд зогсохгүй ажил гүйцэтгэлд шууд хамааралтайгаар сөрөг нөлөө үүсдэг байна.
Иймд энэхүү дипломын ажлын хүрээнд нойр ямар нэг байдлаар дутуу байх нь ажлын бүтээмжид нөлөөлж байгаа эсэх, тэрхүү нөлөөлөгч хүчин зүйлсийг тодруулах, тодорхойлох, нойр болон ажлын бүтээмжийн хамаарал хооронд шинжилгээ хийж, дүгнэлт санал зөвлөмж бичсэн болно.
Уг судалгааны ажилд нийт 34 ажилтан 7 хоногийн туршид өглөө нойрны үнэлэлт бүхий асуумжид, орой хувь хүний ажлын бүтээмжийн үнэлэлт бүхий асуумжид нээлттэйгээр хариулж оролцсон тандалт туршилтын судалгаа юм. Судалгааны хүн ам зүйн 17 асуулгаас гадна нойрны 238, бүтээмжийн 238 нийтдээ 7 хоногийн туршид 476 өгөгдөл цуглуулсан бөгөөд судалсан онол болон загварын үндсэн дээр шинжилгээнүүд хийсэн. Судалгаанд оролцогчдын дийлэнх нь уул уурхайн салбарт ажилладаг ажилтнууд байсан ба бизнесийн болон төрийн, төрийн бус байгууллагаас ажилтнууд хамрагдаж оролцсон юм.
Нойрны асуумж загвар АНУ-ын Үндэсний нойрны сангийн жишиг байсан бол ажлын бүтээмжийн асуумжийн загвар нь ажлын үүрэг даалгавраас шалтгаалсан, ажлын нөхцөл байдлаас шалтгаалсан, ажилдаа дасан зохицсон байдлаас шалтгаалсан зэрэг ерөнхий гурван бүлэг хүчин зүйл бүхий 13 асуултаас бүрдсэн байсан. Судалгааны дизайны загварын дагуу хамаарлын болон найдвартай байдлын задлан шинжилгээнүүдийг хийсэн бөгөөд судалгааны үр дүн бүхий дүгнэлтээс харахад 7 өдрийн туршид нойрны хомсдолын 3 үзүүлэлт буюу шинж чанар нь судалгааны бүх өдрүүдэд ямар нэг байдлаар дутагдалтай гарсан нь манай улсын ажилтнуудын дунд нойрны хомсдол, алдагдал тодорхой хэмжээгээр нийтлэг байна гэж дүгнэх үндэслэл болсон.
