Хураангуй:
Сүүлийн жилүүдэд Монголын Хөрөнгийн зах зээл хурдацтай өсөн нэмэгдэж, иргэдийн хөрөнгө оруулалтын мэдлэг боловсрол, хөрөнгө оруулах хүсэл эрмэлзэл нэмэгдсээр байна. 2021 он Хөрөнгийн зах зээлийн хувьд хамгийн өсөлттэй жил буюу ТОП20 индекс 130%-иар өссөн бол 2022 онд 15.4%-иар унаж, хөрөнгө оруулагчдын хувьд хүндхэн жил болж өнгөрсөн. Өөрөөр хэлбэл олон улсын болон дотоодын эдийн засгийн тодорхойгүй нөхцөл байдал үргэлжилсээр байна. Тиймээс хөрөнгө оруулагчдын шийдвэр гаргалтад туслах үндэслэл бүхий судалгаа, шинжилгээ, хамгийн сүүлийн үеийн олон улсад ашиглагдаж буй банкны үнэлгээний оновчтой арга зүйг ашиглаж, зах зээлийн үнэлгээтэйгээ ижил эсвэл ихээр болон багаар үнэлэгдсэн эсэхийг тооцсон.
Судлагдахуун компаниар МХБ-д арилжаалагдаж буй арилжааны банкнуудыг сонгосон ба эздийн өмчийн чөлөөт мөнгөн урсгалын загвар болон зах зээлийн чиг хандлагын үнийн үржүүлэгчийн арга болох P/E, P/BV харьцаануудыг ашигласан. Үр дүнд: Голомт банкны хувьцааны үнэлгээ 1049 төгрөг “HOLD” буюу 2023 оны 4-р сарын 1 өдрөөс 12 сарын дараа өнөөгийн ханшаасаа 2.34%-ийн өсөлттэй тул “ХАДГАЛАХ”, Төрийн банкны хувьцааны үнэлгээ 731 төгрөг “BUY” буюу 2023 оны 4-р сарын 1 өдрөөс 12 сарын дараа өнөөгийн ханшаасаа 8.87%-ийн өсөлттэй тул “ХУДАЛДАН АВАХ”, Богд банкны хувьцааны үнэлгээ 89 төгрөг “HOLD” буюу 2023 оны 4-р сарын 1 өдрөөс 12 сарын дараа өнөөгийн ханшаасаа 2.78%-ийн өсөлттэй тул “ХАДГАЛАХ” гэсэн тус тус үр дүнд хүрсэн.
