Хураангуй:
Дэлхий дахинд тулгамдаад буй чухал асуудлын нэг бол байгаль хамгаалал юм. Нэг талдаа техник технологи хөгжиж, шинэ нээлтүүд гарч байхад нөгөө талдаа сөргөөр нөлөөлж дэлхийн экосистемийг алдагдуулж байна. Уг асуудалтай тэмцэхийн тулд олон ашгийн бус ТББ-ууд үйл ажиллагаа явуулдаг ч төр болоод иргэдийн туслалцаа дутмаг байдгийн улмаас өнөөдрийг хүртэл санхүүжилтийн хомстолд өртсөөр байна. Том төсөл хөтөлбөрүүд ихэвчлэн гадаадын байгууллагуудаас амжилттай санхүүжилтээ татаж чаддаг ч орон нутгийн төслүүдийн хувьд санхүүжилт асуудал хэвээр байна. Сүүлийн жилүүдэд хүч түрэн орж ирсэн мөнгө татах шинэ эх үүсвэр бол краудфандинг юм. Краудфандинг нь олон нийтийн сүлжээгээр хүмүүсээс их бага хэмжээгээр мөнгө цуглуулахыг хэлдэг ба олон улсад хэдийнээ хөлөө олсон уг салбар нь Монголд ч мөн орж ирээд байна. Уг судалгаагаар краудфандинг ашиглаж Монгол дохь байгаль орчин хамгаалах төсөлд санхүүжилт босгох арга зам, боломжийг тодорхойлох зорилготой бөгөөд ингэхдээ краудфандингийн онолын судалгаа, краудфандинг салбарын өнөөгийн байдлын судалгаа, олон улс дахь краудфандингаар амжилттай санхүүжилт авч хэрэгжсэн байгаль орчин хамгаалах төслүүдийн судалгаа, олон улсын амжилттай үйл ажиллагаа явуулж буй хандивын платформуудын кейс судалгаа, Монгол улсын иргэдээс анкетын аргаар судалгаа тус тус авч дүн шинжилгээ хийсэн болно.
