Хураангуй:
Инфляцын тогтвортой бус байдал нь Төв банкны бие даасан бус байдалтай холбоотой хэмээн олон судлаачид үздэг ба уг асуудлын хүрээнд олон судалгаа хийгдэж, уг сэдвийн хүрээнд эмпирик нотолгоо гаргасан байдаг. Гэвч зарим тохиолдолд Төв банкны бие даасан байдал хангагдсан хэдий ч инфляц хэлбэлзэх тохиолдол бий. Үүнийг зарим судлаачид хуулийн засаглал муутай байгаатай холбоотой гэж үзсэн байдаг. Энэхүү судалгааны хүрээнд Төв банкны бие даасан байдал нь хуулийн засаглалаас хамааран инфляцад хэрхэн нөлөөлж байгааг судлахыг зорьсон болно. Ингэхдээ 1996-2012 оны хоорондын 169 улсын панел өгөгдөл дээр эмпирик шинжилгээ хийсэн бөгөөд үр дүнд нь хөгжингүй орнуудын хувьд Төв банкны бие даасан байдал нь хуулийн засаглалаас хамааран инфляцыг бууруулж байгаа бол хөгжиж буй орнуудын хувьд уг хамаарал ажиглагдаагүй байна. Энэ ялгаа нь хөгжингүй орнуудын 72.22%, хөгжиж буй орнуудын 7.46% хангалттай хуулийн засаглалтай байдагтай холбоотой байж болно гэж үзлээ.
