Хураангуй:
Бизнесийн стратеги ба МТ/МС-ийн стратегиуд өөр хоорондоо харилцан уялдаа холбоотой бөгөөд тэдгээрийн нийцэл нь байгууллагын гүйцэтгэл, өрсөлдөх давуу байдалд эерэгээр нөлөөлдгийг (Kearns, 2000) судалгаанууд харуулдаг. Иймд байгууллагууд МТ-ийн хөрөнгө оруулалтаас дээд зэргийн үр ашиг, үнэ цэнийг хүртэхийн тулд МТ/МС-ийн стратегиа бизнесийн стратегидаа нийцүүлж, хэрэгжүүлэлтийг нь үр дүнтэй удирдах шаардлагатай байна. Энэхүү судалгааны хүрээнд бизнесийн байгууллагуудын стратегийн нийцлийн түвшинг “Стратегийн нийцлийн загвар” (Henderson J. C., 1993) ба “Мэдээллийн системийн стратегийн гурвалжин” (Pearlson, Galletta, & Saunders, 2015) онолын загвараар үнэлэв.
Судалгааны өгөгдлийг улсын эдийн засагт өндөр нөлөөтэй, мэдээллийн технологийг үйл ажиллагаандаа түлхүү ашиглаж буй, үйл ажиллагаа нь мэдээллийн технологи, системүүдээс өндөр хамааралтай болсон Банк санхүү, Мэдээлэл холбоо, Уул уурхай, Худалдаа, үйлчилгээний салбарын 150 гаруй бизнесийн байгууллагыг төлөөлсөн 21 байгууллагын 30 бизнесийн ба мэдээллийн технологийн удирдах ажилтнаас асуулгын аргаар цуглуулсан. Өгөгдөлд статистик болон хүчин зүйлсийн шинжилгээ хийж, байгууллагуудын бизнесийн ба МТ/МС-ийн стратегийн нийцүүлэлтийн төвшинг үнэлж, удирдах ажилтнуудын стратегийн нийцлийн талаарх ойлголтыг тандаж, стратегийн нийцлийн зөрүүтэй байдалд нөлөөлж буй хүчин зүйлсийг тодорхойлов.
Эмпирик судалгааны үр дүнд судалгааны обьект болох бизнесийн байгууллагуудын мэдээллийн систем ба бизнесийн стратегийн нийцлийн түвшин бага, стратегийн тэнцвэрийг хангаагүй байна. Стратегийн нийцлийн зургаан хэсэг бүхий шалгуурын үр дүнд “түншлэл” ба “ур чадвар” хэсгийн үзүүлэлт бусад хэсгээс өндөр боловч, дундаж үнэлгээтэй. Статистик судалгааны үр дүнд “харилцаа холбоо”, “хамтын ажиллагаа”-ны хүчин зүйлсийг сайжруулснаар стратегийн нийцэлд нөлөөлөгч бусад хүчин зүйлсийн үр дүнг сайжруулах боломжтой, үйл ажиллагааны үе шатуудаас “төлөвлөлт”, “гүйцэтгэл”-ийн үе шатан дахь үйл ажиллагаа нь стратегийн нийцэлд өндөр нөлөөтэй байна.
