ХИЙЖҮҮЛСЭН УНДААНЫ ХЭРЭГЛЭГЧИЙН ЗАН ТӨЛӨВИЙГ MGB БОЛОН EMGB ЗАГВАРУУДААР ТОДОРХОЙЛОХ НЬ

Abstract

Тус эрдмийн ажилд маркетингийн тухай онолын ойлголтууд, түүн дотроо хэрэглэгч болон хэрэглэгчийн зан төлвийн талаар онолын судалгаа хийж, хэрэглэгчийн зан төлөв тодорхойлох бүтэцлэгдсэн загваруудаас MGB болон EMGB загваруудыг сонгон авч, хийжүүлсэн ундааны хэрэглэгчийн жишээн дээр зан төлвийг тодорхойлсон. Бүтэцлэсэн загваруудын 12 хүчин зүйлсийг тодорхойлохын тулд санамсаргүй түүврээс анкетын аргаар судалгаа авсан. Түүврийн тоо хэмжээг шкал хэмжигдэхүүний зохистой тоо хэмжээг тооцох томъёогоор тооцоолон гаргахад 216 хүн гарсан. Эрсдлийг тооцон үзэж тус хэмжээг 50%-иар нэмэгдүүлэн 320 хүнээс судалгаа авсан. Судалгаанд хамрагдагсдын хувийн болон ерөнхий тойм мэдээллүүдийг товч дурьдан, бүтэцлэгдсэн загварт хамаарах хүчин зүйлсийг тодорхойлох хувьсагчдын найдвартай байдлыг Кронбахийн альфа коэффициентээр шалгаж үзсэн. Үүний дараа хүчин зүйлсийг илэрхийлэх хувьсагчдыг бүлэглэн нэгтгэж, тэднийг тайлбарлах хувьсагчдын чадвар ямар хэмжээнд байгааг R-р шалгасан. Хүчин зүйлсийн хоорондын хамаарал ямар түвшинд байгаа Пирсоны коррелляцийн коэффициентээр авч үзсэн. Эцэст нь голлох хүчин зүйлсийг дэмжих хүчин зүйлс хэр тайлбарлаж чадаж байгааг R 2 -р тооцсон. Хэрэглэгчийн хийжүүлсэн ундаанд хандах хандлага, зан төлвийн хүсэл, худалдан авах зорилт, өөрөө илтгэх зан төлвийн хувьд альфа коэффициентүүд бүгд 0.7-с дээш гарсан бөгөөд хувьсагчид найдвартай байж чадсан. Судалгааны зарим үр дүнгээс танилцуулахад хэрэглэгчийн хийжүүлсэн ундаанд хандах хандлага нь уух хүслийг төрүүлдэг /corr=0.714/ байна. Тухайн хүний ойр дотны хүмүүсийн хийжүүлсэн ундааг үзэх үзэл нь тухайн хүний ундаа уух хүсэлд шууд нөлөөтэй /corr=0.728/ байна. Хэрэв ундаа уухыг хүсэх юм бол хэрэглээгээ хязгаарлах буюу өөрийгөө хянаад байдаггүй /corr= -0.150/, мөн хүсэх юм бол худалдан авах зорилго тавин шууд худалдан авдаг /corr=0.835/ зэрэг нь ажиглагдсан. Хэрэглэгчийн зан төлвийг урьдчилан тайлбарлах чадварын хувьд өргөтгөсөн хувилбар буюу EMGB загварын хувьд илүү гэдэг нь харагдсан.